په سوريه کې د ولسمشر بشار الاسد مخالف وسله وال وايي د پلازمېنې کنټرول يې په لاس کې اخيستی او بشار الاسد له هېواده وتلی دی. وړاندې رويټرز خبري اژانس ويلي وو چې ښاغلی اسد په الوتکه کې يوه نامعلوم ځای ته تللی دی.
د امریکا منتخب ولسمشر ډونلډ ټرمپ په خپله تروټ سوشل خواله رسنۍ کې لیکلي چې د سوریې ولسمشر بشار الاسد وروسته له هغه "له خپل هېواده تښتېدلی، چې د خپلې ټلوالې روسیې ملاتړ یې له لاسه ورکړ".
"اسد ولاړ. هغه له خپل هېواد ووت.‌ د هغه ساتونکې روسیه، روسیه، روسیه چې ولادیمیر پوتین یې مشري کوي، نور د هغه له ساتلو سره علاقه نه لري".
ټرمپ په خپل پیغام کې دا هم ویلي سوریه کې د روسې د پاتې کېدو لپاره هېڅ دلیل نه دی پاتې چې په وینا یې "دوی د اوکرایین له امله له سوریې سره خپله علاقه له لاسه ورکړه- هغه ځای چې نژدې ۶۰۰،۰۰۰ روسي پوځیان پکې مړه یا ټپیان شوي، دا سیې یوه جګړه کې چې هېڅکله باید نه وای پیل شوې".
ټرمپ وايي بشار اسد د روسیې ملاتړ له لاسه ورکولو وروسته له خپله هېواده تښتېدلی
د متحده عربي اماراتو یوه جګپوړي چارواکي بشار اسد ته له پناه ورکولو ډډه کړې ده.
حکومت مخالفو وسله والو د سوریې ملي تلوېزیون له لارې د بشار اسد د حکومت ړنګېدل اعلان کړل
دمشق کې د ایران د سفارت پر ودانۍ د برید او ملکیت د تخریبولو انځورونه خپاره شوي
د سوریې لومړي وزیر محمد جلالي د ازادو ټاکنو غوښتنه کړې ده
دمشق کې د عراق سفارت بې‌ځایه شوی دی
بې ځایه شوي سوریایان د لبنان – سوریې پولې ته رسېدلي چې خپل هېواد ته ستانه شي
اسرائيلي پوځ له سوریې سره خوندي سیمه کې د خپلو ځواکونو ځای پر ځای کولو اعلان کړی
د هیئة تحریر الشام مشر ابو محمد الجولاني ویلي، راځئ معاصر تاریخ کې تر ټولو د ستر انقلاب د بریا انځور بشپړ کړو
کرښه
د سوریې د بشري حقونو د څار ډله هم وايي، یوه شخصي الوتکه چې د دمشق له هوايي ډګره پورته شوه، ښايي بشار الاسد پکې سپور و.
په ورته وخت کې د حکومت مخالف وسله وال ادعا کوي چې ، د سوریې پلازمېنې ته ننوتلي دي.
رویټرز خبري اژانس د بشارالاسد د حکومت د مخالفو دوو سرچینو په حواله ویلي چې دوی دمشق ته د پوځ او یا د حکومتي ځواکونو له کوم مقاومت پرته ننوتلي دي.
همدا ډول راپورونه وايي، د بشارالاسد مخالفو وسله والو په دمشق کې د راډیو او ټلویزیون ودانۍ کنټرول ترلاسه کړی دی.
د امریکا منتخب ولسمشر ډونلډ ټرمپ ویلي،‌ هېواد یې باید په سوریه کې د روان پرمختګ څرنګوالي کې هېڅ‌ رول ونه لوبوي.
امریکا وايي "په سوریه کې غیر معمولي پرمختګونه له نژدې څاري"
د امريکا د سپینې ماڼۍ د ملي امنیت د شورا ویاند شان ساوت پر اېکس ټولنیزې شبکې یوه پيغام کې لیکلي، "ولسمشر بایډن او د هغه ټیم په سوریه کې غیر معمولي پیښې له نژدې څاري او په سیمه کې له خپلو همکارانو سره په اړیکه کې دی."

په همدې مهال د امریکا نوي ټاکل شوي ولسمشر ډونلډ ټرمپ چې ټاکل شوې د جنورۍ پر ۲۰مه به دنده پیل کړي، د شنبې په ورځ د بشارالاسد د حکومت له نسکورېدو مخکې ويلي وو چې امریکا باید د سوریې په جګړه کې ښکېل نه شي.

د راپورونو له مخې، د اپوزیسیون ځواکونه د حلب ښار برخو ته ننوتل، چې د سوریې دویم لوی ښار ګڼل کېږي. دا د حکومت پر ضد تر څو کالونو وروسته ترټولو لوی برید دی.

د سوریې د بشري حقونو څارونکي وویل چې وسله‌والو دوه هغه موټر چوولي چې له چاودېدونکو توکو یې ډک کړي وو او وروسته یې د کلیو په لور پرمختګ کړی. په دې اړه نور جزییات نه دي ورکړل شوي.

د سوریې رسمي خبري اژانس راپور ورکړی چې پوځ اعلان کړی هغه سیمې یې بېرته نیولې دي چې د اپوزیسیون ځواکونو په ادلب او حلب کې نیولې وې.

د "هیئة تحریر الشام" او ورسره ټلوالو ډلو ویلي، دوی د چهارشنبې په ورځ له برید پیلولو وروسته په حلب او ادلب ولایتونو کې پر یو شمېر کلیو او ښارونو کنټرول ترلاسه کړی دی.

د جمعې په ورځ د یاغیانو اړوند چینل کې خپره شوې یوه بیانیه کې ویل شوي: "زموږ ځواکونو د حلب ښار ته ننوتل پیل کړي."

لومړی، د سوریې د بشري حقونو څارونکې ډلې راپور ورکړ و چې سوریايي او روسي الوتکو د جمعې په ورځ په حلب کې ۲۳ هوایي بریدونه وکړل.

سرچینې وویل، ۲۵۵ کسان، چې زیاتره یې جنګیالي وو، په جګړه کې وژل شوي دي، چې دا د یاغیانو او د حکومت ملاتړو ځواکونو ترمنځ تر څو کلونو وروسته د سوریې ترټولو خونړۍ جګړه وه.

یادې سرچینې وویل، اپوزیسیون ځواکونو له چهارشنبې راهیسې له ۵۰ پر ډېرو ښارونو او کلیو خپل کنټرول ترلاسه کړی دی.

په ۲۰۱۱ کال کله چې د سرویې کورنۍ جګړه پیل شوې ده، په ۲۰۲۰ کال هغه مهال یوڅه کمه شوه چې ترکیې او روسیې - چې د سوریې اصلي ملګري دي - یو اوربند ترتیب کړ چې د ادلب ښار د بېتره نیولو د حکومت هڅه ودروي.

ادلب اوس مهال د اپوزیسیون وروستۍ پیاوړې ځای دی او هلته له څلورو میلیونو ډېر خلک اوسېږي چې ډېری یې د جګړې پرمهال بې‌ځایه شوي او په سختو حالاتو کې ژوند کوي.

د پاکستان د خيبر پښتونخوا ايالتي حکومت په اسلام اباد کې د پاکستان تحريک انصاف له احتجاج کوونکو سره د ادعا له مخې د امنیتي ځواکونو د تاوتريخوالي له کبله درې ورځنی وير اعلان کړی دی.

د پنجشنبې په ماخوستن د نومبر ۲۸ (ليندۍ اته) په پېښور کې د خيبر پښتونخوا ايالتي پارلمان بيړنۍ غونډه بللې وه چې مشر یې بابر سليم سواتي ادعا وکړه چې په اسلام اباد کې د تحريک انصاف د احتجاج پر مهال د دغه ګوند يوشمېر غړي وژل شوي، خو مرکزي حکومت د هغوی "جسدونه پټ کړي" او دولتي ادارې په "بېباکۍ سره دروغ" وايي.

پر دې مهال د قانون ايالتي وزير افتاب عالم وويل چې په خيبر پښتونخوا کې به د جمعې له ورځې درې ورځنی وير پيلېږي. هغه زياته کړه چې په اسلام اباد کې د تحريک انصاف پر غړو سخت تشدد وشو او مستقيمې ډزې ورباندې وشوې.

تر دې وړاندې، د پاکستان د کورنيو چارو وزير محسن نقوي د چهارشنبې په ورځ خبريالانو ته ادعا وکړه چې په اسلام اباد کې د تاوتريخوالي په پېښو کې هېڅ احتجاج کوونکی نه دی وژل شوی. خو پر ټولنيزو شبکو په خپرو شويو ويډيوګانو کې ادعا شوې چې د خيبر پښتونخوا او بلوچستان ايالتونو په ځينو سيمو کې د تحريک انصاف د وژل شويو احتجاج کوونکو جنازې ادا کړل شوې او د هغوی مړي خاورو ته وسپارل شول.

بلخوا د بلوچستان ايالتي پارلمان پر پاکستان تحريک انصاف د بنديز په حق کې قرارداد تصويب کړی دی.

د پنجشنبې په ورځ په کوټه کې په شوې غونډه کې ايالتي وزير سليم احمد کوسه دا قرارداد پارلمان ته وړاندې کړ چې په اکثريت رايو سره ومنل شو. په قرارداد کې راغلي وو چې تحريک انصاف د پاکستان په تاريخ کې د يوې "سياسي انتشاري ډلې" بڼه خپله کړې ده.

د دې قرارداد وړاندې کولو په مهال د اپوزيسيون غړي د غونډې له تالار څخه د احتجاج په توګه ووتل. په عين حال کې د پارلمان ځينو غړيو د دې قرارداد مخالفت وکړ او زياته يې کړه چې که دا دود عام شو نو بيا به په راتلونکي کې دا ډول بنديزونه پر نورو ګوندونه هم لګول کېږي، چې ځينې يې اوس د مرکزي حکومت برخه دي.

دا وروسته تر هغه ده چې د پاکستان تحريک انصاف ګوند زرګونو پلويانو د خپل رهبر او د دغه هېواد د پخواني صدراعظم عمران خان د خوشې کولو لپاره مظاهرې وکړې. دوی د یکشنبې په ورځ احتجاج پيل کړ او د سه شنبې په ورځ د بنديزونو او لارو بندېدو سربېره وتوانېدل اسلام اباد ته داخل شي.

وروسته د پاکستان د کورنيو چارو وزارت د اسلام اباد د امنيت لپاره پوځ وګماره. د نومبر ۲۶ (ليندۍ شپږ) په ماښام امنيتي ځواکونو د احتجاج کوونکو خلاف عمليات وکړل او هغوی يې پر شا وتمبول. پر دې مهال پوليسو پر احتجاج کونکو اوښکې بهېوونکی غاز هم وشینده.

د پاکستان تحریک انصاف ګوند بنسټګر عمران خان د ۲۰۲۳ کال د مې مياشتې پر نهمه نیول شوی وو، خو د سترې محکمې له خوا د هغه ګرفتاري غیر قانوني ګرځولو وروسته نوموړی خوشې کړل شو. تر هغه وروسته عمران خان د همهغه کال په اګست مياشت کې د اداري فساد په يوه قضيه کې بیا ونیول شو چې تر اوسه لا د راولپينډۍ په اډياله زندان کې بندي دی.

وروسته د هغه پرضد نورې قضيې هم جوړې شوې، چې په ځينو کې يې محکمو د خوشې کولو امر کړی دی. عمران خان د هغه پرضد جوړې شوې ټولې قضيې رد کړي او ويلي يې دي چې د دې تر شا سياسي انګېزه ده.