طالبان وايي، پاکستاني پلاوي سره په امنیتي مسایلو او هغه هېواد کې افغان کډوالو سره د ناوړه چلند سربیره په ځینو نورو مسلو هم بحث شوی.

د طالبانو حکومت د بهرنیو چارو ځای ناستي وزیر مولوي امیرخان متقي افغانستان لپاره د پاکستان ځانګړي استازي آصف دراني سره په کتنه کې ویلي چې د دواړو هېوادونو ترمنځ امنیتي ستونزې باید ګډې جرګه ګۍ حل کړي.

ددغه وزارت یوې ویناپاڼې لیکلي: «د بهرنیو چارو وزیر یادونه وکړه چې امنیتي مسایل دې د مشترکو کمیټو له لارې حل شي او لویې د عبور لارې دې د سیاسي او امنیتي ملحوظاتو له کبله نه تړل کیږي.»

ویناپاڼه چې د طالبانو د بهرنیو چارو وزارت یوه ویاند حفیظ ضیا احمد تکل پر خپله ایکس پاڼه خپره کړې زیاتوي؛ په دې کتنه کې په هغه هېواد کې له افغان کډوالو سره په چلند، د تازه سبزیو او میوو صادراتو ته د اسانتیاوو برابرولو او د افغان سوادګرو د ټرانزیټ مالونو په اړه هراړخیزې خبرې شوي.

د افغان سوداګرو ترټولو ستره نېوکه داده چې افغانستان کې د تازه سبزیو او میوو موسم په رارسېدو سره سم د بیلابیلو پلمو له مخې د تورخم دروازه تړل کیږي چې له دې امله افغان سوداګرو ته هرکال درانه مالي زیانونه اوړي.

طالبان وايي، پاکستاني پلاوي ورسره ژمنې کړي چې؛ «د سودګرۍ او ترانزیت او همدا راز د افغانستان او پاکستان تر منځ د عبور په ځایونو کې د رامنځته شوو مشکلاتو لپاره به د حل لارې راوباسي.»

د طالبانو خبرپاڼې زیاته کړې چې پاکستان به ډېر ژر افغان محصلینو ته د تعلیمي بورسونو ورکولو لړۍ بیا پيل کړي.

په افغانستان کې د طالبانو حکومت وايي، د بهرنیو چارو چارسمبالي وزیر یې ملا امیر خان متقي کابل کې د افغانستان لپاره د پاکستان له ځانګړي استازي اصف دراني سره پر امنیتي مسلو خبرې کړې دي.

د طالبانو حکومت د بهرنیو چارو وزارت مرستیال ویاند حافظ احمد ضیا تکل ویلي، له پاکستاني پلاوي سره په وروستیو کې د افغان کډوالو د نیول کېدو او د ډیورنډ پر کرښه د رامنځ ته شویو ستونزو په اړه هم خبرې شوې دي.

د ښاغلي دراني په مشرۍ دغه پلاوی پرون پنجشنبه کابل ته تللی دی.

دغه سفر داسې مهال شوی چې پاکستان کې د اورپکو د وروستیو بریدونو پر سر د تورونو پورې کولو له کبله د طالبانو او پاکستاني چارواکو اړيکي ښه نه دي.

پاکستان کې له تېرو دوو اونیو راهیسې د افغان کډوالو د نیولو بهیر په چټکۍ روان دی چې د فعالانو په وینا تر اوسه اته سوه افغان کډوال نیول شوي دي.

بل لوري ته په تورخم کې د طالبانو د حکومت او پاکستاني پوله ساتو ځواکونو ترمنځ د تورخم لار د یوې اونۍ لپاره تړلې وه.

حافظ احمد ضیا تکل په یوه ټویټ کې ویلي،‌ ددغه وزارت سرپرست امیر خان متقي د افغانستان لپاره د پاکستان ځانګړي استازي اصف دراني سره په لیدنه کې پر امنیتي مسلو سربېره، پاکستان کې د افغان کډوالو پر نیولو او د تګ راتګ پر لارو د جوړو شویو خنډونو د لرې کولو په اړه خبرې کړې دي.

نوموړي ویلي چې د بهرنیو چارو سرپرست پاکستاني پلاوي ته ویلي چې د دواړو هېوادونو ترمنځ‌ لویې عبوری لارې دې د سیاسي او امنیتي مسلو له کبله نه تړل کېږي او د ګډو کمېټو له لارې یې د امنیتي مسلو پر حل لارو ټینګار کړی دی.

ښاغلي متقي زیاته کړې چې افغانستان او پاکستان د دوو اسلامي ګاونډیو هېوادونو په توګه د یو بل خلاف د بیانونو له ورکولو ډډه وکړي او دا باید ددې سبب نه شي چې د دواړو هېوادونو ترمنځ واټن زیات شي.

امیر خان متقي ټینګار کړی چې د ګاونډیو او سیمې هېوادونو په اړه د دوی د حکومت پالیسي د ښه نیت او اخلاص پر بنسټ ده او هېچا ته به اجازه نه ورکوي چې د دواړو هېوادونو ترمنځ‌ روابط خراب کړي.

د بهرنیو چارو وزارت د مرستیال ویناند په وینا دواړو چې د ستونزو د حل په موخه ژر تر ژره اقدامات وکړي چې په راتلونکې کې ددغه ډول پېښو د رامنځ ته کېدو مخه ونیول شي.

ځینو پاکستاني رسنیو ویلي چې کابل ته ددغه پلاوي سفر د سفر موخه د دواړو لوریو ترمنځ د وروستیو امنیتي اندېښنو راکمول دي.

کابل ته د اصف دراني په مشرۍ د پلاوي سفر وروسته تر هغه کېږي چې پاکستان له څو میاشتو راهیسې پرله پسې ادعا کړې چې وسله والې ډلې په هغه هېواد کې د بریدونو لپاره د افغانستان له خاورې ګټه اخلي.

په افغانستان کې د طالبانو له حاکمیت راهیسې پاکستاني څو وارې شکایت کړی چې د دوی د مخالفو وسله والو ډلو مشران په افغانستان کې پټ دي او له هماغه ځایه په پاکستان کې د بریدونو تابیاوې کوي.

دا ادعا د طالبانو حکومت څو ځله په کلکه رد کړې او له پاکستانه یې غوښتي چې د خپلو نیمګړتیاوو پړه پر افغانستان وانه چوي.

د افغانستان لپاره د پاکستان ځانګړي استازي اصف دراني په مشرۍ یو بل پلاوي هم شاوخوا دوه میاشتې وړاندې کابل ته سفر کړی و او هلته یې د طالبانو حکومت له چارواکو سره خبرې کړې وې.

د افغانستان لپاره د امریکا سفارت شارژدافیرې په دوحه کې د طالبانو له یوه پلاوي سره د لیدنې خبر ورکړی. هغې ويلي دي چې په دې کتنه کې دواړو لورو په افغانستان کې له نشه يي توکو سره د مبارزې په تړاو خبرې کړي.
د امریکا متحده ایالاتو سفارت شارژدافیرې، د چهارشنبه په ورځ پر ایکس پاڼه لیکلي چې په دوحه کې یې د طالبانو له یوه پلاوي سره د سیمې هېوادونود اندېښنو او په افغانستان کې د مخدره موادو پر ضد د مبارزې په اړه خبري اتري کړې دي.

د هغه په ​​وينا، په دې ليدنه کې د نشه يي توکو د له منځه وړلو، د بديل معيشت او د روږدو کسانو د درملنې په تړاو هم خبري وشوې.

په افغانستان کې د امریکا سفارت د شارژدافیر د پیغام په یوه برخه کې راغلي: «دا ډېره مهمه ده چې په افغانستان کې دننه او بهر د افغان کارپوهانو مشورې واوریدل شې چې نړیواله ټولنه څه ډول مرسته کولای شي او څومره مهمه ده. د نشه يي توکو پر وړاندې د مبارزې په ټولو برخو کې د ښځو رول مهم او ارزښت ناک دی. موږ له ښځو پرته نه بریالي کیږو.«

نوموړي په ټینګار سره ویلې چې نشه يي توکي له ډېرې مودې راهیسې د افغانستان او نړۍ د خلکو لپاره یو بشري او اقتصادي ناورین دی، خو د ملګرو ملتونو او نورو اړوندو بنسټونو په همکارۍ هڅه کیږي چې د افغانانو دا هیلې ژوندي وساتل شې چې په افغانستان کې ناقانونه مخدره توکي د تل لپاره له مینځه یوړل شې.

طالبانو تر اوسه په دې اړه څه نه دي ویلي

که څه هم طالبانو د افغانستان د واک تر لاسه کولو وروسته د مخدره موادو د کښت او قاچاق پر ضد مبارزې ته زور ورکړی، خو ملګرو ملتونو په دې وروستیو کې په افغانستان کې د مت امفتامین نشه ېې توکیو د قاچاق او تولید د زیاتوالي په اړه یو راپور خپور هم کړی دی.

د تنظېم شويو جرمونو او مخدره موادو پر وړاندې د ملګرو ملتونو د مبارزې ادارې په خپل رپوټ کې ويلي دي چې په افغانستان کې د توليد شويو مت آمفتامين د کشفياتو په اړه رپوټونه په دې هېواد کې نشه یي توکي د اقتصادي بدلون ښکارندوي کوي، هغه ځای چې د نړۍ ۸۰ سلنه غير قانوني اپین چې د هیروینو په جوړولو کې کارول کېږي، پکې توليدیږي.

بل خوا د فرانسې خبري آژانس د راپور له مخې د طالبانو له خوا په افغانستان کې د کوکنارو د کښت د کمښت له امله دا وړاندوینه هم کیږې چې ممکن د مصنوعي مخدره توکو تولید ته د ودې زمینه برابره شې.