"د امریکا نوی دریځ د سولې په تړاو د بدلون ټکی دی"

.

له طالبانو سره د سولې په اړه د واشنګټن دریځ چې د امریکا د یوې باورې ورځپاڼې نیویارک ټایمز په باور (بدل شوی) افغان چارواکي د سولې بریالیتوب ته ډاډه کړي دي.

د سولې عالي شورا مرستیال عطاالرحمان سلیم وایي، امریکایي چارواکي به د خبرو پيل او د باور جوړولو فضا ته لاره هواروي.

ښاغلي سلیم له بي بي سي سره خبرو کې د امریکایي ولسمشر ډونالډ ټرمپ هغه ګام وستایه چې ویل کېږي خپلو ډيپلوماټانو ته یې له طالبانو سره د مخامخ خبرو د هڅو حکم کړی دی.

نيويارک ټايمز ورځپاڼې له طالبانو سره د سولې په اړه د ډونالډ ټرمپ نوی حکم د امریکا په تېر ۱۷ کلن دریځ کې د پام وړ بدلون او د جګړې پای ته رسولو لپاره د امریکا د تلوسې په توګه یاد کړی دی

امریکا دا ډول اعلانونه ځکه د رسنیو له لارې کوي چې د خلکو، طالبانو او سیاستوالو ذهنونه او غبرګونونه معلوم کړي.وحید مژده

ورځپاڼه وايي، گڼو لوړ پوړو افغان او امريکايي چارواکو دغه ستراتيژيک بدلون تاييد کړى چې موخه يې د افغان جگړې د مخالفو غاړو سره نژدې کول دي.

پخوا تر دې څو ځله طالبانو ویلي چې د جګړې اصلي اړخ یې امریکا ده او دوی د سولې خبرې هم له هغوی سره کوي.

د طالبانو ویاند ذبیح الله مجاهد بي بي سي ته ویلي، د امریکا د نوي دریځ په اړه یې یوازې له رسنیو اورېدلي او تر اوسه له دوی سره په دې اړه کومه اړیکه نه ده نیول شوې.

د ارګ سرچینې وایي، هر کله چې د امریکا حکومت له طالبانو سره د مخامخ خبرو په اړه رسمي دریځ وښيي، دوی به یې په اړه خپل نظر څرګند کړي.

د طالبانو د چارو کتونکی وحید مژده بیا وایي، امریکا دا ډول اعلانونه ځکه د رسنیو له لارې کوي چې د خلکو، طالبانو او سیاستوالو ذهنونه او غبرګونونه معلوم کړي.

د نیویارک ټایمز په حواله امریکایي ډيپلوماټانو ته له طالبانو سره د مخامخ خبرو سپارښتنه په داسې حال کې کیږي چې د سیمې په کچه د افغان سولې لپاره هڅې زیاتې شوي او ښې بېلګې یې په دې وروستیو کې د سعودي، کابل، ازبکستان او اندونیزیا غونډې یادولی شو.

له دې سربیره په دې وروستیو کې افغانستان او پاکستان ته د امریکایي چارواکو سفرونه هم شوي چې ویل کیږي له طالبانو سره سوله یې د کارونو په سر کې ده.