د امریکا د بهرنیو چارو نوی وزیر مایک پمپیو وایې چې ولسمشر ډونالډ ټرمپ به د شمالي کوریا له رهبر کیم جونګ اون سره مخامخ ملاقات وکړي.
د لیدنې دقیقه نیټه معلومه نه ده خو ګمان کیږي چې دواړه مشران به د روانې میاشتې په جریان کې یا د جون میاشتې په لومړیو کې سره وویني.
پمپیو د بهرنیو چارو په وزارت کې تر لوړې وروسته، د چهارشنبې په ورځ [مې ۲] د ولسمشر ټرمپ په حضور کې وویل چې دا لیدنه "یو بې ساری فرصت برابر کړی چې د کوریا په ټاپوزمې کې د تاریخ مسیر بدل کړای شي
."
پمپیو ټینګار وکړ چې تیرې تیروتنې به نه تکراریږي، "موږ د شمالي کوریا د ډله ایزو وژنو د وسلو پروګرام د دایمي، تصدیق وړ او په نه بدلېدونکي ډول منځه وړلو ته ژمن یو."
ځېنې کارپوهان وایې چې د بهرنیو چارو وزارت ته د ټرمپ ورتګ دا څرګندوي چې پمپیو د ولسمشر اعتماد ګټلی او د هغه په پوره ملاتړ به د امریکا بهرنی سیاست پرمخ بوځي.
د هرټیج بنیاد غړی، نیل ګارډینر وایې پمپیو به "د عمل پوره خپلواکي او نفوذ ولري."
د بهرنیو چارو وزارت دیپلوماتان تمه لري چې نوی وزیر یې پدغه وزارت کې تشې څوکۍ ډکې کړي او سفارتونو ته سفیران معرفي کړي.
