ټاکل شوې وه د ملي یووالي حکومت اجرائیه مشر عبدالله عبدالله نن د عطامحمد نور د ګواښوونکې وینا په اړه غبرګون وښيي، خو د نامعلوم دلیل له مخې دغه خبرې ونه شوې او وویل شول چې سبا ته وځنډیدې.
په لوېدیځ ولایت هرات کې بیا د جمعیت ګوند د رهبري شورا غړي محمد اسماعیل د عطامحمد نور له هغو خبرو ننګه کړې چې ویلي يې دي، ښاغلي عبدالله د دوی د ګوند حق نه دی ترلاسه کړی.
ښاغلي اسماعیل له ولسمشر محمداشرف غني نه وغوښتل چې حالاتو ته په کتو له زغمه کار واخلي او د عطامحمد نور په اړه شوې پرېکړه دې بېرته واخلي
:
استاد عطا محمد نور لرې کول بې له دې چې په شمال کې ناامنې زیاته او د طالب او داعش فعالیت ته زمینه برابره کړي، بل کوم پيغام نه لري. د ولسمشر فرمان ډیر مهم دی، ځکه چې ولسمشر دی، خو د قران ټکی نه دی ،ولسمشر چې تراوسه کوم زغم کړی مننه ترې کوو، هیله کوم چې زغم نور هم زیات او د عطامحمد نور له تبدیلۍ لاس واخلي."
ولسمشرۍ ماڼۍ تراوسه په دې اړه ښکاره غبرګون نه دی ښودلی، خو دغلته سرچینې وایي، ولسمشر د بلخ د ولایت په اړه پر شوې پریکړې ولاړ دی. یوه اونۍ وړاندې ارګ اعلان وکړ چې ولسمشر د عطامحمد نور استعفا ومنله، خو ښاغلي نور خپله استعفالیک پخوانی او مشروط بللی او ویلي يې دي چې په هېڅ ډول یې نه مني.
عطا محمد نور په خپلو نانندریزو څرګندونو کې پر عبدالله عبدالله سختې نیوکې کړي او هغه یې د "لستوڼي مار"، جمعیت ته "خاین" او "عزت پلورونکی" بللی دی.
کړکېچ ډېرول
د جمعیت ګوند یوه پیژندل شوي غړي امرالله صالح ویلي، د اجرائيه مشر کمزوري کول هېواد کې کړکېچ نور هم زیاتوي.
د عطا محمد نور له پرونیو څرګندونو وروسته تیره شپه یوځل بیا په بلخ کې د جمعیت ګوند لوړپوړي غړي جرګه شوي وو. په مزار شریف کې د جمعیت ګوند ویاند ذبیح الله فطرت د تېرې شپې شویو بحثونو ته داسې اشاره وکړه:
"بحثونه د جمعیت اسلامي په پروګرامونو او همغږۍ راڅرخېدل، پر دې هم خبرې وشوې چې که حکومت د جمعیت غوښتنې ته منفي ځواب ورکوي، پراخ مدني اعتراضونه باید څنګه پلي شي."
د بلخ ولایت له مقامه د عطا محمد نور لرې کول هغه پرېکړه ده چې په ظاهره یې د حکومت مشران له ستونزو سره مخ کړي. یوه اونۍ وشوه چې د ښاغلي نور اعلان شوی ځای ناستی انجینر داود کابل کی دی، خو ویلي يې دي هر کله چې ولسمشر ورته امر وکړي، خپلې دندې ته به ولاړ شي.
