اور دی
اور دی
د زړه اور دی
د عشق زور دی
په گوگل کې، چې تاویږي، را تاويږي
نه مړ کیږي
نه سړیږي
نه ودریږي
لا گرمیږي
لا خوټیږي
لا پخیږي
هټکرۍ په کې ماتیږي
ویلې کیږي
سرې لمبې ترې پورته کیږي
د پنجرو نه یې مرغان لکه سپرغۍ په هوا کیږي
هوااخلئ، هوا نیسي
جگو غرو په لور خوځیږي
هلته،هلته د خپل خیل سره یو کیږي
هلته، هلته سنگر کیږي
 په لوړ غږ بیا داسې وایې
" د ډهلي تخت هیرومه، چې را ياد شي
زما د ښکلی پښتونخوا د غرو سرونه"

 بیا هغه وختی ارام شي
دلارام شي
 چې، ازاد پښتونستان شي
چې، ازاد بلوچستان شي.

۱۵.۱۲.۲۰۲۳
زلمی نصرت
دنمارک

یو خيال دی
خورا سپیڅلی او زلال دی
د لمر او د سپوږمۍ پر لور
د پرواز یو خیال دی
داسې خیال دی
چې، کله را ياد شي
جذباتي شم
غرور را کې پیدا شي
د نیکمرغۍ احساس وکړم
 او په فضا کې سپينې کوترې راته په نڅا شي
روح مې هم خوشاله او هوسا شي

بې له هغه،هر څه را ته
بې مانا شي
بې لاس او بې پا شي
بې صدا شي
بې هوا شي
بې ښکلا شي
بې رڼا شي
ارامتیا او هوش مې، هم رانه کډه وکړي
بې کسه شم
نا هیلې شم
تنها شم
بې پنا شم
غریب شم
بې نصیب شم او
ایمان مې هم نيمگړی شي
که څه هم خورا گران دی
 خو تر لاسه به شي
لیکن،
سر ښندنه غواړي
قرباني غواړي
ودریدل غواړي
برید غواړي
لکه تندر
لکه طوفان
لکه سیلاب
لکه بریښنا
قوي ایمان او باور غواړي
جنگیدل غواړي
ساتل غواړي
حفاظت غواړي
حراست غواړي
د بد خواهانو له ناپاکو لاسو څخه
د غلام ابن غلامه څخه
د هغه چا نه، چې درناوی یې نه کوي او مرگ يې غواړي
د ژوند تر پایه به ورته جنگیږم
تا ته وایم
"ای د ازاد خاورې"

٠٩.١٢.٢٠٢٣
زلمی نصرت
دنمارک

ایرانه کور دې که لمبه شي

نسکوریدل دې که نغمه شي

د افغان درد دې که میلمه شي

ځوانان دې خوار که اواره شي

مونږ د تهران په شان به نه کوو ظلمونه

******************

پنجابه بس دې که بریدونه

پر مهاجرو خپل ظلمونه

پرتا به هم راځي جنگونه

پر سر دې بل به شي اورونه

بیا به درگورو، چې وهې کوم خوا زورونه

دنمارک

۱۰.۱۲.۲۰۲۳