د افغانستان د ټاکنو خپلواک کمېسیون وایي، که د رایو د بیا شمېرنې په برخه کې کمېسیون خپل کار ته نه پرېښودل کېږي او د یو شمېر ټاکنیزو ډلو اعتراضونه په تاوتریخوالي اوړي او ټول بهیر ته ګواښ جوړوي نو بیا د افغان حکومت مسولیت دی چې مداخله وکړي
.
د یاد کمېسیون یوه ویاند مرزا محمد حقپرست بي بي سي ته وویل، دا د افغان حکومت دنده ده چې د ځینو ډلو د نامشروع غوښتنو مخه ونیسي، او کمېسیون ته زمینه برابره کړي چې خپلو کارونو ته دوام ورکړي.
د نوموړي په وینا، که د تېرو ولسمشریزو ټاکنو هر نوماند د خپلو غوښتونو پر اساس د دوی دفترونه بندوي نو د ټاکنو پایلې به تر قیامته هم اعلان نشي.
ښاغلي حقپرست بي بي سي ته وویل، کمېسیون د نوماندانو نظرونو ته احترام لري، خو خپلې چارې به د ټاکلي قانون په چوکاټ کې پر مخ بیایي.
له دې وړاندې یکشنبه د عبدالله عبدالله په مشرۍ د ثبات او همپالنې ټاکنیزې ډلې خبرداری ورکړ که د جنجالي رایو بیا شمېرنه ونه درېږي د قانوني او سوله ییزو لارو چارو نه په ګټې اخیستنې یې مخه نیسي.
ښاغلي عبدالله کابل کې یوې خبري غونډې ته وویل که نن د ټاکنو کمېسیون په خپلې پریکړې له سره کتنه ونه کړي نو په لوی لاس به د ټاکنو مشروعیت تر پوښتنې لاندې راولي.
خو د کمېسیون ویاند ښاغلی حقپرست وایي، دوی ټولو ټاکنیزو ډلو ته د جنجالي رایو د بیا شمېرنې بهیر په اړه کافي مالومات ورکړي، او د همدې کار لپاره یې دا بهیر درې ورځې درولی هم و، خو اوس دا بهیر بیا پیل شوی او پر مخ به ځي.
ښاغلي حقپرست وویل، په ځینو ولایتونو کې لا هم د دوی دفترونه تړل شوي دي او ستونزې شته، خو که دوام وکړي نو دوی به د قانون له مخې د ټاکنو لومړنۍ پایلې اعلان کړي.
د رایو بیا شمېرلو بهیر د لړم په ۱۸ مه نېټه په ټول افغانستان کې پیل شوی و چې په یو شمېر ولایتونو کې د ځینو ټاکنډلو له مخالفتونو سره مخ شو.
د تېرو ولسمشریزو ټاکنو نوماند عبدالله عبدالله وايي د ټاکنو کمېسیون د دوی او نورو ټاکنډلو له څارونکو پرته د رایو بیا شمېرنه پیل کړې او تېره ورځ د دې ټیم غړو پریکړه کړې چې د رایو د بیا شمېرنې په بهیر کې به ګډون ونه کړي.
د رایو د بیا شمېرنې په اړه د کمېسیون یوه کمېشنر حبیب الرحمان ننګ بي بي سي ته وویل چې په شاوخوا نهو ولایتونو کې د رایو د بیا شمېرنې بهیر د یو لړ ستونزو له امله درېدلی او یا هېڅ نه دی پیل شوی، لکه په سرپل،بدخشان، کاپیسا، پنجشیر،تخار،سمنګان، فاریاب، جوزجان او بغلان ولایتونو کې.
د یکشنبې سهاردې کمېسیون ویلي وو چې په ۲۸ ولایتونو کې یې د رایو بیا شمېرنه د ټاکنیزو نوماندانو، انتخاباتي څارونکو او لیدونکو په حضور کې روانه ده.
د رایو د بیا شمېرنې په لړ کې د ۳۴ ولایتونو له ډلې بادغیس، اورزگان، بامیان، لغمان، میدان وردګ او نیمروز کې دا چاره بشپړه شوې وه.
د ټاکنو کمېسیون مشرې حوا علم نورستانۍ پرون شنبه ماښام ناوخته اعلان وکړ چې د ټاکنیزو ډلو له استازو سره دې پرېکړې ته رسېدلې چې د جنجالي رایو د بیا شمېرنې بهیر پیل کړي.
