چین د افغانستان لپاره نوی سفیر ګومارلی؛ طالبان یې د "اړیکو نوی څپرکی" بولي

په افغانستان کې د طالبانو حکومت وايي،‌ چین په کابل کې خپل نوی سفیر ګومارلی دی.‌ د طالبانو له ارګ نه په خپرو شویو تصویرونو کې لېدل کېږي چې د چین نوی سفیر جاو شینګ خپل باور لیک د طالبانو رئیس الوزرا ته سپاري.‌

وروسته له ډېرده مودې، دا لومړی ځل دی چې د طالبانو رئیس الوزرا ملا محمد حسن اخوند د رسمي‌ کار انځورونه خپرېږي. نوموړی کابل ته له ستنېدو مخکې څو میاشتې ناروغ و او کندهار ته د "استراحت" لپاره تللی و.

دافغانستان لپاره د چین دغه نوي سفیر ته د ولسمشرۍ ماڼۍ (ارګ) کې رسمي مراسم هم نېول شوې وو.

د چین نوي سفیر په ارګ کې له رسمي مراسمو وروسته د طالبانو رئیس الوزرا ته باورلیک سپارلی

‌د طالبانو حکومت مرستیال ویاند بلال کریمي پر ټوېټر پاڼه د چین د سفیر له خولې لیکلي چې د چین دغه دیپلومات د خپل هېواد "د مشرتابه نېکې هیلې او سلامونه دافغانستان اسلامي امارت (د طالبانو حکومت) رئیس الوزرا ته وړاندې کړل."

ښاغلی کریمي زیاتوي، د طالبانو لوموړي وزیر هیله ښودلې چې "د چین نوی سفیر به د افغانستان او چین ترمنځ ديپلوماتیکې اړیکې لوړې کچې ته پورته کړي" او دا یې "د نوي څپرکی پیلامه" بللې ده.‌

د
دې لیکنه کې له social media راخیستل شوي مواد شته.‌ له ښودلو وړاندې یې ستاسې اجازه پکار ده، ځکه ښایي‌کوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ

د طالبانو په خبرپاڼه کې د چین د نوي سفیر له خولې دا هم راغلي، چې "چین د افغانستان په کورنیو چارو کې د لاسوهنې پالیسي نه لري" او د افغانستان پرېکړو ته درناوی لري.‌

چین یو له هغو هېوادونو دی چې په افغانستان کې د طالبانو له حکومت سره نږدي اړیکي‌ پالي‌ او سفارت یې هم په کابل پرانیستی دی.‌

تېره مې میاشت کې، د کورونا وبا له پیل وروسته په لومړي‌ ځل د چین اورمچي ښار ته له کابله د اریانا افغان هوايي شرکت الوتنې هم پیل شوې.

ولسمشرۍ ماڼۍ؛ ملا حسن د چین له نوي ډيپلوماټ سره د لیدو کتو پر مهال

چین چې په افغانستان کې د امریکايي‌ ځواکونو د پوځي اډو مخالف و، په تېرو دوو کلونو کې د سیمې د نورو هېوادونو په څېر د بشري حقونو او ښځو په اړه د طالبانو پر ځپونکو تګلارو نېوکې نه کوي او د نورو هېوادونو په چارو کې د "نه لاسوهنې" پر سیاست ټینګار کوي.

سره له دې چې چین خپل نوی سفیر د ځانګړو تشریفاتو له مخې کابل کې معرفي‌ کړی، خو د طالبانو حکومت په رسمیت نه پېژني.

طالب چارواکي او پلویان یې د چین نوي دیپلومات ته په خپلې بهرنۍ پالیسۍ کې د پرمختګ په سترګه ګوري. خو اوس څه باندې دوه کاله وشول چې د طالبانو حکومت نړۍ هېڅ هېواد په رسمیت نه دې پېژندلی.‌