غزل 

 

انجنیر زلمی نصرت

 

ته چې نه یې سخن نه لرم غزل ته

سخن پریږده شیمه نه لرم مزل ته

 

 بل دلبر ته مې هوس په سر کې نشته

ښه سیرآب شمه چې گورم ستا اوربل ته

 

د ارم باغ که هم څوک راته اعطا کړي

بیا به هم اقتدا وکړم ستا درشل ته

 

ته زما د ژوند د لارې رهنما یې

په تیارو کې هم نیاز نه لرم مشعل ته

 

که بیړۍ دې چیرې ډوبه شي په بحر

 زه به هم ځان رسومه هغه تل ته

 

چې د زړه ټکور لرمه ای نصرته

 نه درمان ته مې حاجت شته نه درمل ته.

 

۲۳.۰۴.۲۰۲۴

 دنمارک

وایله