پر دوه سیاسي جغرافیو د هیواد د وېش مخنیوی

دښمن غواړي په دې ډول په حکومت او ځواکونو فشار زیات کړي او دوی فکر کوي له دې سره به خلک دېته مجبوره کړي چې د حکومت پر وړاندې پورته شي او پر جنګي ډلو له جګړې لاس واخلي، مګر دا ډېر احمقانه فکر دی ځکه چې افغان ولس هیڅ وخت هم نه د دښمن فشار ته تسلیم شوی او نه به هم تسلیم شي، بلکې زموږ ولسونه تل د خپلو حکومتونو او ځواکونو تر څنګ ودرېدلي او د دښمن پر وړاندې یې واحد صف جوړ کړی دی.

سږنی کال له امنیتي پلوه افغانانو او په ځانګړي ډول د هېواد امنیتي او دفاعي ځواکونو ته تر ټولو سخت کال وو، ځکه چې جنګ نه یوازې شدت پیدا کړ، بلکې جنګي ساحه بدله شوه. طالبانو او ترهګرو ډلو د مخامخ جګړې پرځای چاودنو او تروریستي بریدونو ته مخه کړه. د افغانستان دښمنانود هېواد په بېلابېلو برخو کې د خپلو بریدونو بڼه بدله کړه او د پلازمېنې په ګډون یې په بېلابېلو ولایتونو، سیمو، عامه ځایونو او لویو لارو کې  چاودنې او بریدونه وکړل، عام خلک یې برمته، ټپیان او شهیدان کړل.

دوی پلان درلود چې د پاکستان په غوښتنه او لمسون د هیواد زیاتو ولایتونو ته سقوط ورکړي او تر خپلې ولکې لاندې یې راولي. د خلکو تر منځ وېره او وحشت خپور کړي او په افغان حکومت او په ځانګړي ډول د هېواد د امنیتي او دفاعي ځواکونو پر وړتیاو او سرښندنو یې بې باوره کړي.

د دغو ولایتونو او ولسوالیو له سقوط څخه د پاکستان موخه دا وه، چې د مذاکراتو پرمهال طالبانو ته په نظام او اداره کې زیاته ونډه ورکړل شي، ځکه دوی داسې ګڼله، چې د مذاکراتو پرمهال به واک د تر ولکې لاندې سیمې په اساس وېشل کېږي، خو له نېکمرغه چې د هېواد د امنیتي او دفاعي ځواکونو د شهامت، زړورتیا، مېړانې او سرښندنو له برکته د افغانستان دښمنان په دې ونتوانېدل، چې د هېواد کوم ولایت او سیمه په بشپړه توګه تر خپلې ولکې لاندې راولي.

لنډه داچې د افغانستان دښمنانو د خپلو بادارانو په زور او لمسون خپل ټول وس وکړ، چې د افغانستان واحده سیاسي جغرافیه په دو ټوټو ووېشي او بیا له هغه وروسته یا سولې ته کېني او یا هم د منتخب او مشروع حکومت د کمزوري کولو لپاره خپلو ورانکاریو او ترهګریزو فعالیتونو ته دوام ورکړي، خو د افغانستان امنیتي او دفاعي ځواکونو د دوی دغه ناوړه هڅې له خاورو سره خاورې کړې او په ډېره مېړانه او زړورتیا یې د افغانستان وسله وال مخالفین وځپل.

د افغانستان امنیتي او دفاعي ځواکونو د سپېڅلي شعارونو (خدای، وطن، دنده) او ملي انګېزې له مخې چې د هېواد، هېوادوالو، ملي ګټو او ملي ارزښتونو دفاع او ساتنه ده، خپله برحقه مبارزه د خپلو مټو او سرښندنو په زور جاري وساتله. د همدغو مقدسو شعارونو او ملي انګېزې له برکته دوی په نشته امکاناتو د جګړې په ډګر کې دښمن مات کړ او اتلواله یې وکړه