دوه رنګي

عبدالملک پرهیز

وریت په اور مو هر ارمان شو

تور لوګی جګ تر آسمان شو

نوې نوې نغمې راغلې

هر څوک سر نغمه د ځان شو

میکدې شوې ړنګېدو بنګې

د مطرب ځای بیابان شو

ها شراب اوس زنګ وهلي

دغه نوی زړه ته زیان شو

هره خوا د اور لمبې دي

نفرتونه ډېر ارزان شو

د باور مزي شلېدلي

چې پټ لمر په لوی اسمان شو

مخ ته یو په څټ بل شان دی

دغه حال د مسلمان شو

ښکلی دوست دی بې وسئ کې

شي دښمن چې کله خان شو

ژر جامې ژبه بدل کړي

چې مقصد یې سود او زیان شو

ما لیدلي داسې خلک 

هم کافر هم مسلمان شو