د افغانستان دفاع سرپرست وزیر اسد الله خالد وايي، د ولسمشریزو ټاکنو د پایلو پرسر د اندېښنو ختمولو په اړه به د داسې احتمالي تاوتریخوالي رامنځ ته کېدو اجازه ور نه کړي، چې د افغانانو ژوند له کړاو سره مخامخ کړي
.
اسد الله خالد کابل کې یوې غونډې ته وویل، د ټاکنو له دواړو کمېسیونونو مننه کوي، چې په ښه توګه یې ټاکنیزې چارې سمبال کړې او تر اوسه یې د ټاکنو پر سر د راولاړو شویو اندېښنو له کبله د احتمالي تاوتریخوالي مخه نیولې ده:
"موږ ډاډه یو چې زموږ سیاستوال دا پوهه لري چې د ټاکنو پایلې به کړکېچ ته نه ځي، خو دا هم ښکاره وایم لکه څنګه چې موږ ویلي بې پرې کار به کوو، هېڅ داسې تاوتریخوالي رامنځ ته کېدو ته به اجازه ورنه کړو چې د افغانانو ژوند له کړاو سره مخامخ کړي."
ښاغلي خالد زیاته کړه، افغان ځواکونه دا وړتیا لري چې د پردیو د دسیسو مخه ونیسي.
یادې غونډې ته د ټاکنو خپلواک کمېسیون مشرې حوا علم نورستانۍ وویل، د ټاکنیزو شریکانو په توګه باید حکومت له دوی سره مرسته وکړي، چې ژر خپلې چارې بشپړې او لومړنۍ پایلې اعلان کړي.
د روانې میاشتې نیمايي کې د افغانستان د ټاکنو خپلواک کمېسیون ویلي وو، که د رایو د بیا شمېرنې په برخه کې کمېسیون خپل کار ته نه پرېښودل کېږي او د یو شمېر ټاکنیزو ډلو اعتراضونه په تاوتریخوالي اوړي او ټول بهیر ته ګواښ جوړوي نو بیا د افغان حکومت مسولیت دی چې مداخله وکړي.
د افغانستان تېرو ولسمشریزو ټاکنو یو نوماند ګلبدین حکمتیار د ټاکنیزو لانجو په درشل کې په صندوقونو کې د اچول شویو ټولو رایو د بیا شمېرنې غوښتنه وکړه.
په ورته وخت کې، د افغانستان د تېرو ولسمشریزو ټاکنو درېیو ټیمونو د رایو بیا شمېرنې له روان بهیر سره پرېکون اعلان کړی.
د عبدالله عبدالله په مشرۍ د ثبات او همپالنې ټاکنډلې، د ګلبدین حکمتیار په مشرۍ د سولې او عدالت ټیم او د رحمت الله نبیل په مشرۍ د امنیت او عدالت هغه ټیمونه دي چې تر بیا شمېرلو مخکې یې د رایو د چاڼ غوښتنه کړې ده.
وړاندې، د افغانستان ولسمشرۍ ټاکنو د نوماندانو شورا په افغانستان کې د ملګرو ملتونو له استازولۍ یا 'یوناما 'وغوښتل چې د افغان ټاکنو سلامتیا کې خپل بې پرې رول ثابت کړي.
د دې شورا ځینې غړو په یوه خبري غونډه کې اعلان وکړ 'اوسني حالت سره د ټاکنو پایلې نه مني.'
په دغه شورا کې د اوسني ولسمشر او ټاکنو یوه کاندید محمد اشرف غني ټاکنیز ټیم شامل نه دی.
