د برتانیا نامتو فزیکپوه سټیفن هاکینګ کورنۍ وايي چې هغه د ۷۶ کلونو په عمر مړ شوی دی. نوموړي د کایناتو په اړه ډېرې علمي پنځونې کړي او څو علمي کتابونه یې لیکلي چې تر ټولو نامتو یې (د وخت لنډ تاریخ) نومېږي.
د هغه اولادونو رابرټ او لوسي لیکلي: " نن ورځ چې زموږ ګران پلار په حق رسېدلی، ډېر خفه یو. هغه ستر عالم او پیاوړی انسان و چې اثار او میراث به یې تر ډېر وخته پاتې وي. "
هغه ۲۲ کلن و چې یو ډول نادرې عصبي ناروغۍ وځاپه چې د عمر تر پایه له خبرو او په خپلو پښو له ګرځېدو پاتې شو
.
هغه مهال د ښاغلي هاکینګ په اړه د ډاکټرانو وړاندوینه دا وه چې تر دوو کالو زیات ژوندی نه شي پاتې کېدای .
نوموړي تر یوه وخته خبرې نه شوې کولی، خو وروسته د یو ډول غږیزې الې پر مټ وتوانېد خپلې خبرې تر نورو ورسوي.
کورنۍ يې وايي نوموړی کامبریج پوهنتون ته څېرمه په خپل کور کې له نړۍ سترګې پټې کړې دي.
ښاغلی هاکینګ لومړنی کس و چې د کوانټم فیزيک په څېر مشهوره علمي تیوري يې وپنځوله.
هغه یو ځل ویلي وو: " زما هدف ساده دی. پر کایناتو پوهېدل، ولې په دې بڼه دي او اصلاً ولې شته؟ "
د هغه له خوا لیکل شوی کتاب (د وخت لنډکی تاریخ) په ۱۹۸۸ کال کې خپور شو، چې تر اوسه ۱۰ میلیونه ټوکه پلورل شوی دی.
په ۲۰۱۴ کال کې د هغه پر ژوند د (د هر څه نظریه) نومی فلم هم جوړ شو، چې اډي رډمین پکې د هغه رول لوبولی دی.
