اشرف غني: اغزن تار ولسونه نشي بېلولی

"

ولسمشر غني د پکتیا پر امنیه قوماندانۍ د تېرې اوونۍ د خونړيو بریدونو په اړه د دغه ولايت له خلکو سره د غمرازۍ څرګندولو ترڅنګ يو ځل بيا پرطالبانو د سولې غږ وکړ او ويې ويل "له تېرو څلویښتو کالونو راهیسې په لومړي ځل د سولې لپاره لوی فرصت شته".

ښاغلي غني په خبرو کې له وسله والو طالبانو وغوښتل چې د سولې غږ یې قبول کړي که نه په وینا یې وبه ځپل شي.

بيا رغونه

ولسمشرغني پکتیا ولایت لومړۍ درجې ته لوړ کړ او هلته یې په نژدې راتلونکې کې د بریښنا، روغتیا او د بیارغونې د ځینو نورو پروژو د پیلولو ژمنې هم وکړې.

ولسمشر محمد اشرف غني د پکتيا له خلکو سره ژمنه وکړه چې په راتلونکي يوه کال کې به په دې ولايت کې د بيارغونې ګڼ شمېر هغه پرمختيايي پروژې پلې کړي، چې د خلکو اساسي غوښتنې بلل کېږي.

ښاغلي غني وویل، "پکتیاوالو ته په تېرو دریو کلونو کې د بیارغونې برخه کې د پام وړ کار نه دی شوی او نور باید د دوی غوښتنو ته مثبت ځواب ورکړل شي".

ولسمشر غني او ورسره مل پلاوي تر غونډې وروسته د ۲۰۳ تندر قول اردو په روغتون کې د ګردېز د وروستۍ پېښې له ټپيانو سره هم ولېدل.

غمرازي څرګنده کړه

د ګردېز په ډله ييزو بريدونو کې چې تېره اوونۍ پر امنيې قوماندانۍ ترسره شول، د روغتيايي مسوولانو په وينا تر شپېتو زيات کسان ووژل شول او تر ۲۳۰ ډېر نور ټپيان شول.

تېره اوونۍ د افغانستان په بېلابېلو ولایتونو کې د وسله والو طالبانو او داعش ډلې په خونړیو بریدونو کې تر دوو سوو زیات کسان ووژل شول، چې ولسي وګړي او امنیتي ځواکونه دواړه په کې شامل وو.