څله به ومرمه زه
ولې به ومرمه زه
که زه څو ځلې وژل شوی یم
تیر باران شوی یم
لکه منصور ځړول شوی یم
په خپلو وينو لوبیدلی یم
که پس له مرگه ژوندی شوی یم
که غورځیدلی یم
بیا پورته شوی یم
څله به ومرمه زه
ولې به ومرمه زه
چې خپله اور یمه اوس
یو انتقام یمه اوس
د غليم مخ ته یو غورځنگ یمه اوس
غرونه هډوکي مې دي
خاوره خړ تن مې ده
امو، هلمند او اباسين د رگو وينې مې دي
نور نه ډاریږمه به
زه هم انسان یمه
ددې جهان یمه
غواړم انسان و اوسم
په دې جهان و اوسم
آزاد انسان و اوسم
یو با غروره او با پته یو افغان و اوسم
ښه مسلمان و اوسم.
زلمی نصرت
دنمارک
