د روانې جګړې د مخنیوي لپاره دې پر پاکستان نړیوال فشارونه زیات شي

.

سړک حکومت د هیواد د اتباعو د عبور لپاره جوړوي، تر څو هیوادوال په اسانی او په کم وخت کی له یو ځایه بل ځای ته لاړ شي، کلینیک حکومت د یو هیواد د اتباعو د ناروغیو د مخنیوی لپاره جوړوی تر څو هیوادوال خدای مه کړه مریضان نشی. ښوونځی حکومت د هیواد د اتباعو د ذهنونو د روڼولو لپاره جوړوی تر څو هیوادوال د نړی په مختلفو برخو کی بریالی شي او ښه او بد وپیژنی خدای او رسول وپیژنی هغه لار وپیژنی چی مونږ ته الله ج امر کړی چی مونږ په کومه لار لاړ شوه او په کومه لار لاړ نه شو، خو متاسفانه زمونږ ځینی هیوادوال د ناپوهۍ، د سواد او پوهې کچې د ټیټوالي او یا کوم مادي لالچ او حسد له مخې دغه مهم ځایونه د نورو په لمسون ورانوی او پر دی باندې نه پوهیږی چی زه دغه مهم ځایونه په کوم اساس باندی ورانوم  .

همدغه بدمرغه اشخاص نن په افغانستان کی د پاکستان  نیابتی جګړه پرمخ وړي. په دې کې شک نشته چې د دغې جګړې تر شا به د ځینو نورو هېوادونو او استخباراتي شبکو لاس هم وي، مګر د ترهګرۍ او روان جنګ تر ټولولوی ملاتړی پاکستان دی چې عملاً له افغانستان سره په نا اعلان شوي جنګ کې ښکېل دی.

د پاکستان حکومت د افغان حکومت مخالفینو ته په پاکستان کی ځای ورکړی هغوی ته هلته روزنه ورکول کیږی اسلحی ورکول کیږی په ځینو مواردو کی د پاکستان استخباراتی اداره په افغانستان کی د ځینو عملیاتو مشری هم کوی . حتی په ښارونو او ملکي ځایونو کې د وحشتناکو تروریستي بریدونو چې د تاسیساتو  د ویجاړېدو او د ملکي وګړو د بېدرېغه تلفاتو لامل کېږي په هغو ټولو کې د پاکستان استخبارات مستقیم لاس لري او دا بریدونه د دوی په مستقیمه لارښوونه او امکاناتو ترسره کېږي.

د دغه جنګ ودرول د افغانستان او افغانانو له وسې وتلی کار دی، نو پکار ده چې په دې برخه کې نړیواله ټوله او متحدین له افغانستان سره همکار شي، پر پاکستان عملاً فشارونه زیات کړي او دېته یې مجبور کړي چې د ترهګرو له ملاتړ څخه لاس واخلي او د جګړې او دښمنۍ پرځای له افغانستان سره د دوستۍ لاره خپله کړي، ځکه که چېرې د دغې روانې تحمیلي جګړې مخه ونه نیول شي، نو باور دی چې لمبې او تاو به یې د سیمې او ان د نړۍ هېوادونو ته ورسېږي، ځکه چې ترهګري او افراطیت هیڅ حد او سرحد نه پېژني، د دوی یوازینۍ موخه یوازې د وحشت، نهیلۍ او بې باورۍ خپرول او د وېرې د فضا ایجادول دي.