د سولې کمی

.

پرېمانه طبیعي زېرمو او منابعو ته په کتو په وطن کې یوازې د سولې کمی دی او که خدای تلپاتې سوله وطن ته راستنه کړه، نو بیا هر څه شوني دي، مګر ولسمشر غني په تېرو څلور نیمو کالو کې د جنګ، ناامنیو او ګڼو نورو ستونزو باوجود د افغانستان له منابعو او فرصتونو څخه د استفادې په برخه کې مهم ګامونه پورته کړل او لا هم په دې برخه کې د زیاتې استفادې عالي او ګټور پلانونه او برنامې لري چې له امله به یې هیواد باثباته شي او د پرمختګ په لور به ګړندي ګامونه واخلي.

که  مو ګاونډي هیوادونه په ارامه پرېږدي افغانستان به ډېر ژر پر خپلو پښو ودرېږي. د خپل ولس لپاره به په هیواد دننه د کار زمینه برابره شي او په ښه ایماندارۍ او صداقت سره به خپله دنده ترسره کوي.غالۍ هم یو له هغو مهمو صنایعو څخه دي چې په کور دننه خلکو ته د کار او ژوند زمینه برابروي، ځکه دا مهال یونیم میلون کسان نر او ښځې د غالیو په صنعت کې مصروفه دي، ځینې یې په کورونو کې د اوبدلو وسایل تیار کړي او په کورونو کې غالۍ اوبي او بازارونو ته یې وړاندې کوي، خو زیاتره یې بیا په فابریکو کې خپل ځانونه مصروفه کړي دي، او غواړي چې له همدې لارې خپلو بچیو ته یوه مړۍ حلاله روزي وګټي او په ارامه یې سره وخوري. او د هیواد په اقتصاد کې هم له افغان حکومت سره مرسته وکړي.

زموږ اکثره غالۍ اوبدونکي چې د کډوالۍ پرمهال پاکستان ته لاړل، نو پاکستان د دوی اوبدلې غالۍ په خپل نوم نړۍ ته صادرې کړې او لا یې هم صادروي. ولسمشر غني د دغې چارې د مخنیوي په موخه غالۍ اوبدونکي او د دوی استازي ور وغوښتل او هغوی ته یې په ننګرهار، هرات او کندز کې ښارګوټو او فابریکو لپاره ځمکې، برېښنا او نورې اسانتیاوې ورکړې چې اوس یې د جوړولو چارې روانې دي. د دغو غالیو اوبدونکو له راستنېدو سره دغه صنعت لا ښه وده کولی شي.

افغان تجاران  او صنعتکاران په دې خوښ دي چې د ولسمشر غني د پاملرنې له برکته له یوې خوا ورته اسانتیاوې برابرې شوي او له بل لوري د نړۍ بازارونو سره وصل شوي دي. دوی اوس په اسانۍ سره کولی شي چې په خپل لاس اوبدل شوي توکي اروپا او امریکا  ته ولېږي چې له دې لارې هم زیاته ګټه کوي، هم د هیواد نوم په نړۍ کې یادېږي او هم د هیواد داخلي عواید ورسره زیاتېږي.  

ولسمشر غني غواړي د صنعت له ودې او داخلي منابعو او تولیداتو څخه د استفادې له لارې کرار کرار افغانستان پر بهرنیو مرستو د اتکا پرځای پر ځان تکیه کړي او د داخلي عوایدو له لوړېدو سره د دې زمینه برابره کړي چې افغانستان نور په خپلو پښو ودرېږي او د همدې لپاره یې د سیمې هیوادونو سره د دوه اړخیزې همکارۍ او یو لړ لویو سیمه ییزو پروژو تړونونه لاسلیک کړي دي او لا یې هم هڅه داده چې کورني او بهرني پانګوال په افغانستان کې پانګونې وکړي.