په خړ لېست کې د پاکستان شاملېدل به د افغانستان لپاره څومره ګټور وي ؟

.

که چیرته پاکستان د مالی چارو لپاره کاري ډلې (ایف . اې . ټي . ایف) د غوښتنو پر اساس د ترهګرو د تمویلولو څخه لاس وانه خیست نو له ارزونې وروسته به پاکستان په تور لیست کې شامل  اوله زیاتو اقتصادي بندیزونو سره به مخامخ شي چی اوس مهال پدې لیست کې یوازې ایران او شمالي کوریا ځای لري .

د روان کال په فبروری میاشت کې د پیسو سپینولو د دغه نړیوال سازمان لخوا له افغانستان سره په پوله پروت هیواد پاکستان ته د درې میاشتو ضرب الاجل وټاکه تر څو په خپله خاوره کې د فعالو ترهګرو ډلو د مالي سرچینو د وچولو په برخه کې عملي اقدامات وکړي ، خو د پاکستان لخوا سم عملي اقدامات ونه شو چې له امله یې پاکستان د ترهګرو د تمویلوونکو هیوادونو په خړ لیست کې شامل شو .

پر پاکستان باندې دا تورونه دي چې خپلو ګاونډیو هیوادونو ته ترهګرې ډلې لیږي او له دوی سره مالي مرسته کوي. افغانستان چې له پاکستان سره ډېره اوږده سرحدی پوله لري، له همدې پولې ترهګر اوړي او راوړي اوطالبانو ته د پاکستان په خاوره کې  روزنه هم ورکول کیږي .

افغان حکومت له پاکستان نه په بار بار وغوښتل چی طالبان له خپلې خاورې وشړي یا دې له افغان حکومت سره سولې ته تیار کړي او هغه طالبان چې له افغان حکومت سره د سولې په برخه کې خنډونه جوړوي هغوی دې ونیسي او افغان حکومت ته دې تسلیم کړي ، خو پاکستان تل له افغانستان سره په خپلو خبرو صادقانه عمل ندی کړی او همېش یې له افغانستان سره دوکه کړې .

د امریکا د متحده ایالاتو ولسمشر ډونالډ ټرمپ پدې وروستیو کې پر پاکستان فشارونه راوړي تر څو د هغوترهګرو په مقابل کې جدي اقدامات وکړي چی د افغان دولت او ناټو پر ضد جګړه توده ساتي. تیر کال ولسمشر ټرمپ د افغانستان په هکله خپله تازه تګلاره اعلان کړه . ولسمشر ټرمپ په ۲۰۱۸م کال کی په لمړنی ټویټ کی لیکلي و (امریکا متحده ایالاتو په احمقانه توګه پاکستان ته د تېرو ۱۵ کلونو په موده کې له ۳۳ میلیارده ډالرو ډېرې پیسې ورکړي او دوی (پاکستان) بیا په بدل کې له درواغو او چل پرته څه نه دي راکړي او زموږ مشرانو ته یې د احمقانو په توګه فکر کړی. دوی هغو ترهګرو ته خوندي ځایونه ورکوي د کومو پر ضد چې موږ په افغانستان کې د کمې مرستې باوجود جګړه کوو . دا به نور پېښ نه شي ).

(ایف . اې . ټي . ایف) له پاکستان نه غوښتي چې باید د طالبانو ، اسلامي دولت ډلې ، القاعده ، جماعت الدعوه ، فلاح انسانیت فاونډیشن ، لشکر طیبه ، جیش محمد او حقاني شبکې په څیر ډلو خلاف اقداماتو ، قاچاق او نشه یي توکو پر ضد مبارزې په څیر مسایلو ته ځانګړې توجه وکړي تر څو له دی لیست نه ځآن وباسي .

پاکستان اوس مجبور دی د هغو ترهګرو پر ضد عملي ګامونه واخلي چې سیمې ته خطر جوړوي ځکه د پاکستان هیواد نه ګاونډي هیوادونه په خاصه توګه افغانستان او هندوستان ډېر شکایت کوي او دواړه هیوادونه له نړیوالو غوښتي چې پاکستان زمونږ سیمې ته ترهګر رالېږي او زموږ سیمه پرې ناامنه کوي .

پاکستان ته د ۲۰۱۹ کال سپټمبر پورې ضرب الاجل ټاکل شوی ، چی دغه اقدامات عملي کړي او که چېرته یې اقدامات عملي نه  کړل نوم به یې په تور لیست کې شامل شي چې له ډېرو نړیوالو اقتصادي ستونزو سره به مخامخ شي .