د افغانستان د ماليي وزرات وايي چې د ملي راډيو تلویزون د ملکیت اړوند یوې ټوټې ځمکې د خرڅولو او یا اجاره ورکولو په اړه څېړنې کوي.
دغه وزارت وروسته له هغه دا ژمنه څرګندوي چې د افغانستان د مشرانو جرګې د شکایتونو کمېسیون وویل، د ملي راډيو تلویزون اړوند هر جریب ځمکه هر کال د یوه سټرلنګ پاونډ په بدل کې د برتانیا سفارت ته په اجاره ورکړل شوې ده
.
د ماليي سرپرست وزیر همایون قیومي چې نن په همدې اړه د مشرانو جرګې د شکایتونو کمیسیون ور بللی و، د دې کمیسیون مشر زلمي زابلي د پوښتنو په ځواب کې وویل چې د ملي راډيو تلویزون د یوې برخې ملکیت په اړه چې هر حکم صادر شوی د ولسمشرانو په کچه و.
ښاغلي قیومي وویل "یو ځل د پخواني ولسمشر حامد کرزي پر مهال او دوهم ځل د ولسمشر غني له خوا."
تر دې وړاندې د مشرانو جرګې د شکایتونو کمیسیون مشر زلمي زابلي ویلي وو چې ملي وحدت حکومت په غیر قانوني توګه د ملي راډيو تلویزیون یوې اندازې ځمکې د خرڅولو اقدام کړی دی.
د ملي راډيو تلویزیون چارواکو بي بي سي ته ویلي چې د کاناډا په سفارت د پلورل شوې لس جریبه ځمکې سربېره شاوخوا ۲۵ زره متر مربع نوره ځمکه د ۵۰ کالونو لپاره اسیایي بانک، د بریتانیا سفارت او اروپايي ټولنې ته هر کال د یو سټرلېنګ پاونډ په بدل کې په اجاره ورکړل شوې ده.
د دې ادعاو په ځواب کې د مالیې چارسمبال وزیر نن یکشنبه په دې اړه د پلټنې ژمنه وکړه چې ګواکې د افغانستان د ملي راډیو ټلوېزیون اړونده ځمکه بې بدله یا په لږو پیسو پلورل شوې ده.
همایون قیومي د مشرانو جرګې غړو ته معلومات ورکول. خو ښاغلي قیومي سناتورانو ته وویل په دې اړه که هره پرېکړه شوې وي، د ده تر کچې لوړه ده.
ملي راډیو ټلوېزیون بي بي سي ته ومنله چې ددغې ادارې لس جریبه ځمکه د کاناډا سفارت ته په څه باندې لس میلیونو ډالرو اجاره ورکړ شوې او تر څنګ یې ۲۵ زره مربع متره نوره ځمکه د ۵۰ کلو له پاره د کال په یوه پونډ چې نژدې سل افغانۍ کېږي، آسیایي بانک، اروپایي ټولنې او د برتانیا سفارت ته ورکړ شوې ده. دغو سفارتونو او ادارو لا تر اوسه په دې اړه څه نه دي ویلي.
ملي راډیو تلویزیون یو حکومتي بنسټ دی او له لسیزو راهیسې د کابل په تر ټولو مهمه سیمه کې دی. دغلته د امریکا په ګډون د نورو هېوادونو سفارتونه ګردچاپېره موقعیت لري او ولسمشرۍ ماڼۍ څو سوه متره ترې لېرې ده.
د سیاسي او ډیپلوماتیکو بنسټونو د شتون له کبله په دغه سیمه کې کلک امنیتي تدابیر شته چې د ملي راډیو تلویزیون ساحه یې هم خوندي کړې.
