د افغانستان د ولسمشرۍ ماڼې وايي، په بهرنیو چارو وزارت کې پر یو لړ اصلاحاتو کار کوي، چې پر بنسټ به یې د دې وزارت لید لوری او سیاست په سیمه ایزه او نړیواله کچه تر ډېره پر اقتصادي همکاریو او د اړیکو پر پیاوړتیا را وڅرخي. د ولسمشر محمد اشرف غني ویاند صدیق صدیقي نن یکشنبه کابل کې خبریالانو ته وویل، په دې وزارت کې ګومارنې باید له دې وروسته د وړتیا پر اساس وشي
.
د ارګ ویاند په داسې حال کې دا څرګندونې کوي چې کابو یوه اوونۍ وړاندې د افغانستان د بهرنیو چارو سرپرست وزیر صلاح الدین رباني له خپلې دندې استعفا وکړه او پر ځای یې ادریس زمان د دې وزارت نوی سرپرست ونومول شو.
ښاغلی صدیقي وایي، راتلونکي اصلاحات به هم د دې وزارت په تشکیل او جوړښت کې وي، او هم به یې د پاليسۍ او سیاست یا د محتوا په برخه کې وي.
دا مهال د افغانستان بهرنیو چارو وزارت ۱۱۰۰ ډیپلوماټان لري خو ارګ وايي چې دا شمېر زیات دی او باید دې وزارت کې اصلاحات راشي او د پوهې او وړتیا له مخې د کار وړ کسان په دندو وګومارل شي.
د ارګ ویاند صدیق صدیقي وویل، ولسمشر غني د بهرنیو چارو وزارت له سرپرست وزیر سره په ناسته کې په دې موضوع خبرې کړي دي. نوموړي نن یکشنبه کابل کې یوې خبري غونډې ته وویل:
"د اصلاحاتو راوړلو په موخه ولسمشر غني د بهرنیو چارو وزارت له رهبرۍ نه وغوښتل چې د ډیپلوماټانو او بهرنیو چارو وزارت د کارکوونکو د ګومارنې او تعیناتو په برخه کې باید سم او منل شوي معیارونه په پام کې ونیول شي، تر څو په دې اداره کې خلک د وړتیاو او پوهې پر اساس وګمارل شي".
ښاغلي صدیقي همدا راز په ننني خبرې کنفرانس کې وویل، افغان حکومت ته سیمه ایزې اقتصادي اړیکی، د اقتصادي همکاریو پیاوړي کول په سیمه ایز او بهرنۍ کچه لومړیتوب لري.
د ښاغلي صدیقي په خبره د بهرنیو چارو وزارت ته پکاره ده چې اقتصادي لیدری هم ولري. نوموړي وویل:
"د افغان حکومت او ولسمشر لید لور دا دی چې زموږ دغه بنسټ باید تر ډېره د بهرني سیاست په برخه کې فعال شي او د دې وزارت ډېر تمرکز، سیاست او لید لورې باید پر اقتصاد وي. افغان حکومت لپاره سیمه ایزې اقتصادي اړیکی، د اقتصادي همکاریو پیاوړي کول په سیمه ایز او بهرنۍ کچه لومړیتوب لري".
د بهرنیو چارو پخواني سرپرست وزیر صلاح الدین ربانې یوه اوونۍ وړاندې په خپل استعفاءلیک کې په غیر مستقیمه توګه پر ولسمشرمحمداشرف غني او ارګ نیوکه کړې وه چې په حکومت کې یې موازي جوړښتونه رامنځته کړي او مهمې دولتي ادارې یې له صحنې لېرې ساتلي دي.
د افغانستان د بهرنیو چارو وزارت د ملي یوالي د حکومت د ویش له مخې د اجرائیه ریاست په برخه شوی و. له دې وړاندې هم افغان ولسمشر د دې وزارت د اصلاحاتو لپاره یو حکم صادر کړی و چې د اجرائیه رئیس عبدالله عبدالله له لوري رد شوی و.
هڅه مو وکړه، چې د ولسمشر لخوا د دې وزارت د بیا اصلاحاتو په اړه د اجرائیه ریاست نظر ولرو، خو له هڅو سره سره ونه توانیدو چې له هغوی سره اړیکي ټینګي او په اړه یې نظر ولرو.
خو د حکومت ځيني سياسي مخالفین د ملي یوالي حکومت په وروستیو ورځو کې د اصلاحاتو په نوم په وزارتونو کې پراخ بدلون تر ډېره سیاسي کړنه بولي.
