د ملګرو ملتونو کلتوري او علمي اداره یونيسکو وايي، په افغانستان کې یې پرلیکه یا انلاین بڼه پښتو ویونکو میندو، پلرونو او د هغوی کورنیو ته د سواد زدکړې نوي کورسونه پیل کړي دي.
د دغه بنسټ په وینا، د څلورو لسیزو جګړې، طبیعي پېښو او بېوزلۍ د افغانستان تعلیمي نظام سخت ځپلی چې له کبله یې په دغه هېواد کې د نړۍ په کچه د لوستو ځوانانو او لویانو شمېر خورا کم دی.
یونیسکو وايي چې د افغانستان یوازې ۴۷ سلنه ځوانان چې عمرونه یې له ۱۵ تر ۲۴ کلنۍ دي، لیک لوست کولای شي خو د لوستو لویانو کچه بیا ایله ۳۱.۴ فیصده ده.
همدا راز یې ویلي چې د دغه هېواد یوازې ۱۷ سلنه ښځې د لیک لوست جوګه دي.
د ملګرو ملتونو دغه فرهنګي او علمي بنسټ وايي چې د دغو انلاین کورسونو پر مټ به د کورنۍ لویان او ماشومان ټول د خپلو ورځنیو کارونو تر څنګ د سواد زدکړې کورسونو کې ګډون وکړای شي او په خپلو کورونو کې دننه به په روزنیزو چارو کې ښکېل شي.
یونیسکو د دغو "پرلیکه کورنیو ټولګیو فورم" جوړ او خپور کړی چې د کورنۍ غړي ځانونه پکې راجستر کولای او هلته له شته درسي موادو ګټه اخیستلی شي.
د ملګرو ملتونو دغه سازمان داسې مهال په افغانستان کې په ځانګړي ډول د لویانو او ښځو د لیک لوست د کچې د ټيټوالي او ورته د انلاین روزنیزو کورسونو جوړولو خبره کوي چې د طالبانو حکومت تر شپږم ټولګي پورته نجونې ښوونځيو، لیسو او پوهنتونونو ته نه پرېږدي.
که څه هم واک ته له رسېدو سره د طالبانو حکومت د ښوونځيو بندښت "لنډمهاله" بللی و خو اوس پرې څه باندې ۸۰۰ ورځې یا دوه کاله اوړي.
همدغه بندیزونه د دې لامل شول چې په وروستیو دوو کلونو کې په کور دننه او بهر بېلابېل بنسټونه او د زدکړو فعالان په ځانګړي ډول د نجونو لپاره پرلیکه ټولګي او روزنیز کورسونه جوړ کړي.
که څه هم دغه نوښت حالاتو ته په کتو یو مناسب بدیل وګڼل شو خو د ځينو په باور، هغومره ګټور نه دي چې په کار ده.
ځکه چې په افغانستان کې که یو خوا انټرنټ ډېر قیمته دی نو بلخوا یې د کېفییت هم خونده نه شته او تر لویو ښارونو هاخوا په لرو پرتو ځينو سیمو کې خو بیا انټرنټ ته لاسرسی کله ناممکن او کله هېڅ د کار نه دی.
په بېلابېلو سیمو کې د برېښنا کمښت او نشتوالی هم د پرلیکه زدکړو پر وړاندې بل لوی خنډ بلل کېږي.
نو مالومه نه ده چې د یونیسکو له لوري به دغه پرلیکه بڼه کورسونه څومره ګټور ثابت شي او څومره کورنۍ به ورته لاسرسی ولرلی شي.
یونیسکو وايي، افغانستان کې یې پښتو ویونکو میندو او پلرونو ته د سواد زدکړې "انلاین" کورسونه پيل کړي
Typography
- Smaller Small Medium Big Bigger
- Default Helvetica Segoe Georgia Times
- Reading Mode
