د آلو ګل

د نورستان او د لغمان په مینه
زما د وردک د مڼو ګل ته سلام
ځم له کابله د پغمان په درو
د چاریکار ارغوان ګل ته سلام
بزګر اولس ته دي سلام وی زما
زما د بامیان کچالو ګل ته سلام
زما د فاریاب او د کندوز په باغو
د بدخشان د پسته گل ته سلام
له شبرغانه تر واخانه ز مونږ
د میمنی د پخته ګل ته سلام
مزل د میني په ګامو وهمه
زما د مزار د لاله ګل ته سلام
سلام سلام په جګو غرو د وطن
د ننګرهار د نارنج ګل ته سلام
د اباسین او د سپین غر په کچه
د پکتیا د چنار ګل ته سلام
ځم د زابل او د شینډنډ په پلو
د کندهار د انار ګل ته سلام
زمونږ د ګلابو او سنځلو ګلان
زما د هلمند د اینځر ګل ته سلام
د ارزګان او دایکندی او فراه
د ارغنداب د بادام ګل ته سلام
په هره خوا کي دي باغونه ولاړ
زما د هرات د انګور ګل ته سلام
سلام سلام زما هر ګل ته سلام
زما د غزنی د آلو ګل ته سلام
عزیزی        غزنوی
۲-۴-۲۰۱۹
تورنتو        کاناډا