‎سوله زموږ اړتیا ده :

. 
‎بدبختانه په افغانستان کې د څلورو لسیزو خونړیو جګړو زموږ څخه هر څه واخیستل، موږ یې په هر لحاظ وځپلو، ولس مو در په دره شو، هغه وخت تنظيمي جګړې وې چې ددې جګړو رهبر د سیمې استخباراتي کړیو کوله، د همدې جګړې له لاسه ځيني داخلي جاسوسه کړۍ دومره شتمنۍ پيداکړې چې اوس  یې ټولولی نشي.
‎ولې ‌‌‌‌‌‌ډېر افغانان یې داسې برباد کړل چې تر ننه یې د خوشحالۍ مخه نده لیدلې، ځکه ددې جګړې د لاسه کورونه له جنازو ‌‌‌‌‌‌ډک و، زرګونه  ښځې، کون‌‌‌‌‌‌ډې، میندې بورې، ماشومان یتیمان، پلرونه بې زامنو، خوېندې بې ورونه ، شول چې تر ننه د ‌‌‌‌‌‌ډېرو افغانانو په زړونو دا سوی داغ همداسې تازه پاتې دی، چې د ورځې په تېرېدو سره دا داغ او د زړنو زخمونه یې تازه کېږي.
‎اوس یې وخت راغلی چې د  افغانستان د هرې کورنۍ د زړه دغه سوی داغ جوړ شي، ځکه چې هره کورنۍ او هر انسان سوله غواړي، موږ خوبشخته یو چې د ولسمشر غني په څېر داسې یو ولسمشر لرو چې د افغانانو د عمرونو هیلې او خوبونه رښتیا کوي.
‎ولسمشر غني د سولې د پاره داسې هڅې شروع دي چې ‌‌‌‌‌‌ډېره لږه موده کې به دا هڅې یوه ښه پایله ولري.
‎په کوچني اختر کې ولسمشر له وسله والو طالبانو سره د اوربند فرمان ورکړ، سم د لاسه وسله والو طالبانو هم په خپلو جګړه مارو غږ وکړ چې د اختر په ورځو کې  هېڅ راز  بریدونه نه کوي، موږ ولیده چې دواړه غاړو څومره په خوند سره د سولې کوچنی اختر ولمانځه .
‎اوس هم هڅې روانې دي چې لوی اختر کې به بیا اوربند اعلانېږي، دا وار داسې هیلې هم شته چې دا اور بند به تلپاتی کېږي.
‎وسله والو طالبانو باندې هم غږ کوو چې تاسو هم ددې هېواد  بچیان یاست ، تاسو هم کورنۍ لرئ چې ستاسو په مرګ دردېږي، تاسو چې په کومه جګړه بوخت یاست دا نه جهاد دی ، او نه کومه اسلامۍ فلسفه لري، د سیمې استخباراتي کړۍ ظالمې دي لتاسو د افغانانو په وړاندې د ځان په ګټه استفاده کوي. 
‎اړتیا ده چې تاسو هم راشئ له افغان دولت سره یو ځای شئ او د خپلې خاورې ساتنه وکړئ، د پردیو ظالمو استخباراتو په وړاندې یو شئ، تر څو نوره ددې هېواد وګړي له جګړې څخه خلاصون پيدا کړي. 
‎ولس هم باید د دولت په دې کړنو سترګې پټې نه کړي، بلکې ملاتړ یې وکړي. 
‎دا مو هېواد دی په ټولو حق لري.
‎ټول باید په اخلاص سره د خپل دولت په څېر خپل مسوولیتونه ترسره کړو.