د امنيتي ځواکونو روزنه او سنبالښت

.

د هېواد د امنیتي او دفاعي ځواکونو د مسلکي پوهې او پوځي وړتیا لوړېده دوه عمده ګټې لري، لومړۍ ګټه یې داده چې د هېواد د دفاع او ساتنې په برخه کې موثر اقدامات ترسره کېږي، په عملیاتو کې د تلفاتو کچه فوق العاده راکمېږي او دویمه ګټه یې داده چې د دوی موثرو کړنو، وطنپالنې، مبارزې، سرښندنو او چلند ته په پام له وسله والو ځواکونو سره د هېوادوالو مینه او خواخوږي زیاتېږي.

له همدې امله د هېواد په تاریخ کې تر بل هر وخت زیات زموږ هېوادوال د خپلو امنیتي او دفاعي ځواکونو ټینګ ملاتړي دي او پر دوی یې د پخوا په نسبت باور هم زیات شوی دی، ځکه د ټولو هېوادوالو هیله او غوښتنه همداده چې غیر مسوول وسله وال افراد او ګروپونه دې له منځه لاړ شي ځکه له هغوی څخه دوی د خطر احساس کوي، مګر له امنیتي او دفاعي ځواکونو سره د ارامۍ، امنیت او ډاډ احساس کوي.

د وروستيو دريو لسيزو جګړو په بهير کې زموږ د ملي وسله والو ځواکونوظرفيتونه هم د تجهيزاتو او لوژستيکي امکاناتو او هم د پوځي نظم او ديسيپلين او قواعدو له مخې صفر ته رسېدلي وو. ان تر دې چې هیڅ عسکر او څارندوی مو نه درلود چې يونيفورم ولري او لږ تره لږ د پوځي نظام له نورمونو سره برابر وي. په همدې ترتيب داسې مناسب پوځي تاسیسات مو نه لرل او یا راپاتې نشو چې د يو ځواکمن امنيتي بنسټ  استازيتوب وکړي.

له ۱۳۷۹ کال راهیسې د طالبانو د رژیم له را پرځېدو او په هېواد کې د نوي تحول له راتګ وروسته په دې برخه کې له صفر څخه کار شروع شو، سره له دې چې میلیاردونه ډالر د امنیتي او دفاعي ځواکونو د تشکیل او د پوځي تاسیساتو او بنسټونو په جوړولو ولګول شو، سره له دې چې پایله یې د لګول شویو منابعو او امکاناتو په اندازه چې توقع یې کېده نه وه، خو په وروستیو درې نیمو کلونو کې په دې برخه کې پام وړ اصلاحات، پرمختګ او بدلون راغی، ځکه چې هم د روزنې او تجهیزاتو له پلوه په کې ښه والی راغی او هم په کې د فساد مخه ونیول شوه، سلسله مراتب مراعت شوه، واحده قومنده ایجاد شوه، د امنیتي او دفاعي ځواکونو د قربانیانو کورنیو ته د رسیدګي لپاره اقدامات وشو او لا هم کېږي او همدارنګه د ټپیانو اساسي درملنه، د دوی د حالت پوښتنه او د ګڼو اسانتیاو په ایجاد تمرکز زیات شو.

نن موږ ګورو چې د افغانستان دښمنان او ترهګرې ډلې زموږ له مېړنیو او اتلو امنیتي او دفاعي ځواکونو سره د مخامخېدو جرئت نه لري او ډېرې سیمې یې هم له ولکې وتلي دي دا ټول د همدغو درې نیمو کالو د هلو ځلو او د امنیتي او دفاعي ځواکونو دسرښندنو برکت دی او باور دی چې دې برخې ته د هېواد د رهبرۍ د پاملرنې له امله به لا ښه پرمختګ او بدلون راشي، ځکه چې د وسله والو ځواکونو ملاتړ ته د نړیوالو پام او مرستې را جلب شوي او د دوی په لیکو کې ورځ تر بلې ښه والی او بدلون محسوسېږي.