په سوله کې نور وضاحت هم راغی

.

سوله د افغان ولس او حکومت اساسي غوښتنه ده چې حکومت بار بار وسله والو مخالفینو ته له هر ډول قید او شرط پرته د بین الافغاني مذاکراتو له لارې د سولې بلنه ورکړه، خو هر ځل دوی دغه د ولس او سولې غږ ته نه یوازې لبیک نه دی ویلی، بلکې ښکاره یې رد کړې او په ځواب کې یې وحشت او جنایت ته مخه کړې.

حتی په دې وروستیو کې یې پلازمېنه کابل کې د تروریستي برید په ترسره کولو سره داسې انساني فاجعه رامنځته کړه چې د طالب وسله والو پر وړاندې یې د ولس کرکه او نفرت راوپاراوه او  دغو بریدونو د سولې په اړه د حکومت دریځ هم بدل کړ.

ولسمشر غني پرون د جمعې په ورځ د لمانځه له ادا کولو وروسته ملت ته په خطاب کې د سولې په اړه هم واضح او قاطع خبرې وکړې، هغه وویل، له هغو طالبانو سره چې وروستي جنایتونه او ترورستي بریدونه یې ترسره کړي دي او بیا یې د هغو د ترسره کولو مسوولیت هم منلی دی، له هغوی سره د سولې مذاکرات نه کېږي.

جمهور رئیس غني حتی په نورو هغو طالبانو چې ځان افغان او مسلمان بولي غږ وکړ چې د افغان ولس له قاتلانو او ترهګرو دې خپله لاره جلا کړي، خکه نن د حق او باطل صفونه سره جلا کېږي. هغه په ټینګار سره وویل د افغانستان د خلکو او دولت صف د حق صف دی او هغوی چې د تروریستي بریدونو او جنایتونو پلویان نه دي، نو د حق له صف سره دی یو ځای شي.

افغان حکومت پخوا ویل چې یوازې له داعش ډلې او بهرنیو تروریستانو سره د سولې مذاکرات نه کوي او هغوی به سخت وځپي، مګر له ټولو افغان وسله واله طالبانو سره د سولې مذاکراتو ته له قید او شرط پرته چمتو وو، خو د دغو وروستیو بریدونو له ترسره کولو وروسته حکومت حتی له طالبانو سره د مذاکراتو په برخه کې هم محدودیت او شرط وضع کړ او هغه دا چې هره هغه ډله چې افغان وژنه کوي او په وروستیو بریدونو کې لاس او مسوولیت لري له هغوی سره د سولې مذاکرات نه ترسره کېږي.

د سولې مذاکراتو په برخه کې د دغه وړ محدودیتونو وضع کول هم ګټه لري او هم تاوان، ګټه یې داده چې د سولې په برخه کې وضاحت رامنځته کېږي او دښمن ته څرګند دا پیغام ورکوي چې که د سولې اراده لرې، نو لومړی باید له افغان وژنې لاس واخلې او د سولې مذاکراتو ته ځان تیار کړې، داسې امکان نه لري چې هم دې ترهګریز بریدونه ترسره کوي او هم دې د سولې په نامه د خلکو د تېراېستلو هڅه وکړي.

د دغه شرط او محدودیت تاوان دادی چې ممکن د افغانستان دښمنان او د حکومت ځینې داخلي مخالفې سیاسي کړۍ ورڅخه د حکومت د ملامتولو او د سولې پروسې د ټکني کولو لپاره استفاده وکړي او داسې وښیي چې حکومت د سولې نیت او اراده نه لري، نو ځکه دغه ډول شرطونه  او محدودیتونه وضع کوي.