غل د کور خاوند تر ستوني نيسي؛ ګوښه شوی يار بيا په غصه شو

خپاره شوي تازه معلومات ښیي چې د هغه په چاپېر قوماندانانو، د خلکو استازو او د ګذر وکیلانو په دې هکله خبرې کړي چې موجود حکومت واک پرېږدي او دا چې هغوی به په دې لړ کې په مرکز او ولایتونو کې پراخې غونډې ترسره کړي.

دا لومړی ځل نه دی چې ښاغلی مسعود له ګوښه کيدلو وروسته د حکومت په خلاف څرګندونې کوي بلکې څو ورځې وړاندې يې هم حکومت ته مستقيم اخطار ورکړ چې که نوموړی په خپل پوسټ يا بلې څوکۍ ونه ګماري نو کورنۍ جګړه به رامنځته شي.

د ضياء مسعود د ګوښه کيدلو په لاملونو مو په تيره ليکنه کې تبصره وکړه چې درې عمده نظرونه شتون لري. لومړی دا چې د مسعود څوکۍ د ولسمشر غني لخوا د ملي امنيت پخواني رييس امرالله صالح ته د نوي پوست رامنځته کولو قربانې شوې ده. دويم دا چې ضياء مسعود پتيلې وه چې د غويې په اتمه د مجاهدينو د بري د ورځې د لمانځنې په ورځ خپله استعفا ولسمشر ته وړاندې کړي خو دا چې ولسمشر پرې خبر شو نو په خپله يې ګوښه کړ. او دريم دا چې نوموړي له بړستې خپلې پښې ډيرې بهر کړې وې او د حکومت له داخل څخه د حکومت د کلک مخالف رول يې ادا کولو. نو د دې له امله چې ښاغلی مسعود په حکومت کې دننه د پنځمې ستنې حيثيت درلود او غني ترې د خطر احساس درلود نو له دندې يې وشړلو.

له دندې د ضياء مسعود ګوښه کولو د نوموړي په زړه کې پولۍ ولاړې کړي دي او اوس د دې لپاره چې له غني غچ واخلي؛ د حکومت بدلولو او د موقت حکومت د جوړولو نغارې ډنګوي. اصلاً که د ضياء مسعود تيرې کړنې وازول شي نو نه يواځې دا چې له دندې ګوښه کول يې غوره اقدام دی؛ بلکې د خپلو تيرو خيانتونو له امله بايد په سزا محکوم شوی وای. ځکه يو حقيقت خو چې ټول ولس ته معلوم دی هغه د ښې حکومتولۍ په چارو کې د ولسمشر د ځانګړي استازي په پوسټ باندې د ضيا مسعود د بدې حکومتولۍ کارونه دي چې معاش او امتياز يې له دولت اخيستلو خو کارونه او څرګندونې يې د حکومت د مخالف وسله وال او يا اپوزيسون ته ورته وې. ډيری ځلونه يې د حکومت د ملاتړ او د امنيتي ځواکونو د ملاتړ په خلاف له شخصي مليشو او وسله والو په جوړولو تاکيد کړی دی. په ډيری مواردو کې يې په هغه حکومت چې پخپله دی يې يو جز و او ځوی يې زبير مسعود په کې د ملي امنيت شورا ستر سلاکار دی؛ پراخې نيوکې کړي او په يو ډول يې هڅه کړې څو د حکومت مخالفت لپاره د خلکو ذهنيت جوړ کړي.

همدا راز څه موده وړاندې د حامد کرزي په نړيوال هوايې ډګر کې له غير قانوني پيسو سره د نیول کيدو خبرونه يې هم خپاره شول، همداراز په 2007 کال کي يې په دوبۍ کې له غیر قانوني ډالرو سره د نيول کيدو خبرونه خپاره شول. په ملي يووالي حکومت کې کې پرې د کابل په سمارټ سيټي کې هم د پرېمانه پيسو اخيستلو تور پورې وو. او اوس په تازه کې د تاند خبري ویب سایټ د خبر پر اساس ويل کيږي چې په نيږدې ورځو کې احمد ضيا مسعود فراه ته قطري شيخان بېولي وو، ځان يې ورته په حکومت کې د وروستۍ پرېکړې سړی معرفي کړی و او بيا يې ورڅخه پرېمانه پيسې تروړلې وې.

په پښتو کې يو نکل دی چې وايې په ډيموکراسۍ کې غل د کور څښتن له ستوني نيسي چې ولې يې د کور ديوالونه لوړ جوړ کړي دي؛ د همدې نکل په مصداق اوس ښاغلي مسعود هم د حکومت د ړنګولو او د غني استعفا ته مټې بډوهلې دي. خو هیڅ يې هم په لاس نه ورځي. حکومت بايد يواځې له دندې د ضياء مسعود په ګوښه کولو بسنه ونه کړي بلکې د نورو خلکو د عبرت لپاره بايد پر نوموړي د تورونو سپيناوی وکړي او که چيري د محکمې لخوا مجرم وپيژندل شي بايد زندان ته وليږل شي.

لیکنه : خوشحال آصفي