د ولسمشر اوربند رنګ راوړ

.

افغان ولسمشر وروسته له هغې د وسله والو افغان طالبانو پر ضد د اوربند اعلان وکړ چې تېره اونۍ د دوشنبې په ورځ د هیواد له ګوټ ګوټ څخه جیّد دیني علما او خطیبان پلازمېنه کابل د لویې جرګې خېمه کې سره راټول او د یوې لویې درې زره کسیزې غونډې په ترڅ کې یې په افغانستان کې انتحاري او انفجاري بریدونه ناروا وبلل.

د افغانستان اسلامي جمهوري دولت د علماو د یادې غونډې له فتوا څو شیبې وروسته د هغوی د فتوا تود هرکلی او قدرداني وکړه. په یاده فتوا کې د نورو موادو ترڅنګ په جنګې ښکېلو غاړو (حکومت او وسله والو طالبانو) باندې غږ شوی و چې په خپلو کې دې اوربند وکړي. د افغانستان اسلامي جمهوري دولت د هیواد د علماوو د دغې متفقې فتوا له اعلان  وروسته نه یوازې دا چې د دغې فتوا د موادو او محتوا ملاتړ وکړ، بلکې د هیواد د علماوو په غونډه کې د اوربند له ضمني پیشنهاد څخه هم یې ملاتړ وکړ او تېره پنجشنبه جمهور رئیس غني رسماً اوربند اعلان کړ. په همدې اړه د ولسمشر په ویډیویي پیغام کې راغلي دي چې:

”په همدې خاطر د روژې د مبارکې میاشتې له ۲۷ نیټې څخه د کوچني اختر تر پنځمې پورې اوربند اعلانوم او په عین وخت کې د هېواد ټولو امنیتي او دفاعي ځواکونو ته هدایت ورکول کیږي چې د اوربند پر مهال پر افغان وسله والو طالبانوخپل ټول تهاجمي عملیات متوقف کړي، خو د داعش، القاعدې او نورو بین المللي تروریستي شبکو په ضد به عملیات ادامه ولري.“

په ملي او بین المللي کچه د ولسمشر غني د اوربند پراخ هرکلی او ملاتړ وشو او تر ټولو ښه لا دا چې په ځواب کې یې وسله والو طالبانو هم اوربند وکړ. افغان ولس له دغه اوربند سره اوس یو ځل بیا سولې ته هیله من شوی دی او د روژې په دې مبارکه میاشت کې د خدای تعالی دربار ته همدا دعا کوي چې د دواړو لورو دغه موقت اوربند دې په دایمي اوربند، د جنګ په پایته رسېدو، سوله، پخلاینه او دایمي ثبات بدل شي.

داسې اټکل کېږي چې که افغان وسله وال طالبان د اختر په ورځو کې د خپل اعلان شوي اروبند تطبیق ته ژمن پاتې شي، نو باور دی چې دا به د سولې د بین الافغاني مذاکراتو د پیل لپاره یو ښه ګام وي، ځکه له دې سره د دواړو غاړو تر منځ د باور فضا رامنځته کېږي او څومره چې یو پر بل باور زیاتېږي، نو همغومره ورسره د سولې تمایلات هم زیاتېږي.

د افغان سولې په اړه تر دې مهاله یوازې په ملي، د سیمې او نړیواله کچه اجماع موجوده وه، مګر په جنګ کې ښکېلو غاړو خصوصاً وسله والو طالبانو سولې ته غاړه نه اېښوده او تل یې پر جنګ ټینګار کاوه، ځکه د حکومت د سولې د هر ځلي بلنې او وړاندیز سره یې رد او منفي ځواب ورکړی، مګر دا لومړی ځل دی چې د حکومت له اوربند وروسته طالبان هم ورته عمل کوي، نو داسې برېښي چې که خدای کول دا ځل به دواړه غاړې د سولې لپاره پر بین الافغاني مذاکراتو هم توافق ته ورسېږي.