افغانستان او سعودي عرب دوه بېلا بېل قراردادونه لاسلیک کړي دي چې پر بنسټ به یې سعودي عرب افغانستان ته له ګټې پرته ۲۲۰ میلیونه سعودي ریال پور ورکوي.
د افغانستان د مالیې وزارت وايي په دې پېسو به د کابل د حلقوي سړک یوه برخه او د هېواد په بېلا بېلو سیمو کې ۱۰۰ ښوونځي ودان کړي.
سعودي عرب ته د ولسمشر محمد اشرف غني د سفر په ترڅ کې د افغانستان د ماليې وزیر محمد همایون قیومي او د سعودي عرب د پراختیايي صندوق د چارواکو تر منځ له ګټې پرته د سعودي لخوا افغانستان ته د پور قراردادونه لاسلیک شوي دي.
د ماليې وزارت ویاند شمع روز خان مسجدي وايي، د همدې قرارداد له مخې به سعودي عربستان افغان حکومت ته د کابل د حلقوي سړک د یوې برخې جوړولو لپاره ۱۸۰ میلیونه ریال ورکوي.
د کابل حلقوي سړک شاوخوا ۱۰۰ کیلومتره اوږدوالی لري چې د ټول سړک پر رغوونه ۱۱۰ میلونه ډالر لګښت اټکل شوی دی.
دا سړک د کابل د پلچرخي په سیمه کې د کابل ـ جلال اباد له لویې لارې پیلېږي، او د ده سبز ولسوالۍ کې د کابل ـ پروان له لویې لارې، د پغمان ولسوالۍ د حیدر خان کلا په سیمه کې د کابل ـ میدان وردګو له سړکه او د کابل په چهار اسیاب ولسوالۍ کې د کابل ـ لوګر له لویې لارې تېرېږي او په ټوله کې د کابل پر ټول ښار راڅرخي.
د افغان او سعودي چارواکو تر منځ د پور دویم قرارداد په ټول افغانستان کې د ۱۰۰ ښوونځیو ودانولو په تړاو دی.
د سعودي عرب پراختیايي صندوق د همدې ښوونځیو د ودانولو لپاره ۱۸۷ میلونه ریال پور افغان چارواکو ته منلی چې د کلیو پراختیا او بیا رغونې او پوهنې وزارتونه به د ښوونځو د جوړولو لپاره ګډ کار کوي.
د لاسلیک شویو قراردادونو پر اساس به افغان حکومت سعودي عربستان ته بېرته همدا پورونه ۴۰ کاله وروسته ورکوي.
