ټول افغانان سوله غواړي، ځکه چې دا جګړه زموږ نده، دا پردۍ تپل شوې جګړه ده او افغانانو تل هڅه کړې دا جګړه د سولې د لارې ودروي خو زموږ بې رحمه دښمن کله هم په افغانانو رحم ندی کړی ، تر ډېره یې د افغانانو له پاکو احساساتو استفاده کړې ، او دا ځوانان یې د خپلو شومو اهدافو قرباني ګرځولي
.
د حکومت مشران مو دا څلور کاله کېږي د افغانستان د جګړې د پای په لټه کې دي او غواړي افغانستان کې یوه دایمي او با عزته سوله راشي.
په دې تړاو زموږ مشرانو ډېرو نړیوالو هېوادونو ته سفرونه کړي او په نړیوالو کنفرانسونو کې یې ګډون کړی او له نړیوالو یې په وار وار غوښتي څو د افغانستان د سولې پروسې ملاتړ وکړي، د امنیت شورا سلاکار اتمر صیب چې کله سعودي ته لاړ وُ د سعودي چارواکو سره یې د افغان سولې په اړه خبرې وکړې، چې سعودي چارواکو د افغان سولې څخه د ملاتړ تر څنګ د مستقیمې همکارۍ ژمنه هم وکړه، همداسې ترکیې ، هېواد چین، ازبکستان، او ډېر شمېر هېوادونو د افغان سولې ملاتړ کړی، تېره میاشت د شانګهای غړو هېوادونو هم په یو خوله د افغانستان د سولې ملاتړ وکړ او ددې پروسې د مسقیمې همکارۍ ژمنه یې وکړه.
یعنې په ټوله کې د افغانستان د ملي یووالي حکومت مشرانو په لږه موده کې وکولی شو د افغانستان د سولې موضوع نړیواله کړي ، او دا یې نړۍ ته واضع کړه چې په افغانستان کې جګړه یواځې د افغانستان د پاره تهدید نده بلکې دا اور یې ټولې نړۍ ته غزېدلی شي نو اړتیا ده چې د سیمې هېوادونه او نړیوال د ترهګرو په وړاندې ګډه مبارزه وکړي، په هر حال زموږ حکومت خو خپلې هڅې د سولې د پاره کړي او کوي یې .
زموږ مسوولیتونه څه دي؟
موږ هم د سولې په راوستو کې لوی مسوولیتونه لرو. قومي مشران چې د افغانستان په کچه په ډېرو موضوعاتو کې موثر تمامېدلی شي کولی شي هغه ناراضه ځوانان چې د پردیو په لمسون یې ټوپک را اخیستی او خپل بل ورور یعنې امنیتي ځواکونه شهیدانوي دوی ته وپوهول شي چې دا جګړه د هیچا په ګټه نده.
دا ځوانان باید له جګړې را وګرځول شي، لکه څنګه چې موږ په رسنیو کې وینو د اکثرو ولایتونو ځوانانو د جګړې د پای د پاره مدني حرکتونه پيل دي ، علما مو د جګړې ضد فتواوې ورکوي دا ټول د افغانستان د جګړې په پای کې لویه ونډه لري.
یعنې ولسونه د سولې په راوستو کې ډېر ګټور تمامېدلی شي ، ځیني کړۍ شته چې د افغانستان سوله نه غواړي ،ځکه چې دا کړۍ د سیمې استخباراتو ګمارلي دي دوی ددې استخباراتو په ګټه دلته فعالیت کوي، ددې کړیو فعالیت دا دی چې د افغانانو په منځ کې بې اتفاقي راولي او افغانان سره وپاشي ،
دا نو د افغانانو مسوولیت دی چې دا کړۍ سره له دې چې پېژني یې هم اړتیا ده چې له خپلو منځونو یې وشړي او ټول په یوه اتفاق سره د خپل حکومت ملاتړ وکړي او د سولې روانې خبرې بریالۍ کړي .
سوله د افغانستان د تجزیې په معنی نده ، سوله د افغانستان د آرامښت په معنی ده ، سوله د جګړې د پای په معنی ده .
سوله کې ژوند دی، سوله کې پرمختګ دی ، سوله کې یووالی دی، سوله کې آبادي ده.
موږ سوله غواړو.
مینه منګل
