له کابله ورغلو ته د منافقینو خطاب

.

دغو ورغلو کسانو ته د امین جان مجددي په نوم د طالب پلاوي یو غړي په خپلو څرګندونو کې د منافقینو خطاب کړی، مګر له کابل څخه د څلوېښتو تنو ورغلو له ډلې څخه یوه یې هم تراوسه په دې اړه کوم رسمي غبرګون نه دی ښودلی.

د دغو کسانو ګډون په غونډه کې نهایت کم رنګه و، دوی نه واحد نظر درلود او نه یې هم ثابت دریځ درلود. طالب پلاوي د دوی پر وړاندې خپلې ټولې غیرمعقولې غوښتنې په ډېر وضاحت او جرئت مطرح کړې او دوی هم ښې په دقت واورېدې، خو د ولسمشر کرزي په ګډون چې دیارلس کاله د افغانستان ولسمشر و او همدارنګه نور چې اکثریت یې د هغه د وخت د کابینې غړي وو، نه له نظام، نه له لاسته راوړنو او نه هم د افغانستان له ملي امنیتي ځواکونو او حتی اساسي قانون څخه دفاع وکړه.

له کمزوري دریځ څخه مذاکراتوته ورتګ دا او دېته ورته ګڼې ستونزې لري چې ګډونوال به نه ثبات لري، نه به دریځ لري، نه به خبره لري، نه به جرئت لري او نه به هم قاطعیت لري، حتی د ملي ګټو د پاللو او ساتلو لپاره د سپارښتنې تر حده هم د څه ویلو جرئت نه کوي. د کمزوري دریځ د مذاکراتو ټوله ګټه پردیو ته رسېږي، نو زیان یې یوازې او یوازې افغانان ويني، له همدې امله د ولسمشر غني همېشنی ټينګار دادی چې دوی مذاکراتو ته له قوي دریځه داخلېږي.

مسکو ته تللي افغانان باید هیواد ته له راستنېدو سره سم دوه کاره وکړي، لومړی دې له ملت او افغان دولت څخه رسمي بښنه وغواړي چې د دوی بې مشورې او بې اجازې مسکو ته لاړل او هلته یې د افغانستان هیڅ ډول استازولي ونشوه کړای. دویم کار دې دا وکړي چې د رسنیو پر وړاندې دې مطبوعاتي کنفرانس ورکړي، هلته دې د مسکو د غونډې ټول او خصوصاً ناویلي جزئیات او هغه مسایل مطرح کړي چې زموږ له ملي ګټو او ارزښتونو سره په ټکر کې دي.

په دویم قدم کې دې دوی د خپلو ځانونو دفاع وکړي او له امین جان مجددي څخه دې وپوښتي چې په کوم اساس یې دوی منافقین بللي دي؟ که چېرې دوی د نوموړي د دغو څرګندونو پر وړاندې همداسې خاموش پاتې شي، نو دا په دې مانا چې دوی رښتیني منافقین دي، خو که دوی فکر کوي چې منافقین نه دي، نو باید په کلکو ټکو د طالب پلاوي د غړي دغه څرګندونې وغندي او هغوی دېته مجبوره کړي چې له دوی څخه بښنه وغواړي او د حیثیت اعاده یې وکړي. که چېرې دوی کوم رسمي غبرګون ونه ښیي، نو دوی وسله والو طالبانو ته لا قوت او مشروعیت ورکوي .