غني احمدزئ له بېلا بېلو بانډونو سره په ننګونه کې

مرادزئ

افغانستان پخپل تاریخ کې نن سبا له داسې سختو او پيچلو شرایطو سره مخ دئ چې ګوندې له پلې صراط څخه تېریږي . زموږ هېواد هیڅوخت له نړیوالو ، سیمه ایزو او په کور دننه له دومره لویو ستونځو ، شخړو او ننګونو سره نه و مخ شوئ .
د ستونځو هومره سختوالئ او د پېښو دومره چټکتیا ، له افغانستان څخه د یوه پیاوړي او غښتلې ملي مشرتوب ، غوڅې او پریکونې ملي ادارې غوښتنه کوي . دا د افغانانو دنده چې روانو شرایطو ته په پام خپل ملي مشرتوب وټاکي او د پېښو د بهیر واګي خپل لاس کې ونیسي . که داسې ونه شي دهېواد راتلونکې برخلیک له هر ډول زیان سره مخامخېدلئ شي .
د ټولټاکنو روان بهیر ښۍ یوخوا هغو ملي ځواکونو دریځ نېولئ چې غواړي په هېواد کې ملي او سراسري مشرتوب رامنځ ته شي او د هېواد روان ناورین ته د پای ټکئ کیښودل شي . خو بلخوا بیا سمتي ، قومي او مذهبي بانډونه دي چې هم يي د ملي سراسري مشرتوب مخه نیولې او هم يي د روان ناورین په ادامه کې بېلا بېلا ګټې نغښتې او افغاني ټولنه يي له راز راز ستونځو او کړاوونو سره مخ کړې ده.
د هېواد په شمال کې د نظارشورا او اسلامي جمعیت په مشرۍ سمتي او قومي بانډ ، په هېواد کې تر نورو بانډونو زیات د ملي اداري په رامنځ ته کېدو کې خنډ شوئ دئ . دوی اوس په راتلونکو ټولټاکنو کې د ولسمشرۍ لپاره د خپل نوماند پتوګه عبدالله عبدالله راپېژني . عبدالله چې د رباني او مسعود په مشرۍ په ۹۰ ومو کلونو کې د کابل د ۶۵ زرو ولسي وګړو په وژلو او د پلازمېنې کابل په ورانۍ کې ښکېل او تورن دئ ، تر اوسه يي ددې تورونو د سپيناوۍ په اړه ولس ته ځواب نه دې ویلئ .
دې باڼد په ۹۰ ومو کالونو کې د افغانستان لپاره د ملګرو ملتو د سولې تګلار له پښو وغورځوله او هېواد يي کورنۍ جګړې ته ورټېله کړ . که په ټولټاکنو کې بریالئ شي د هېواد اساسي قانون به داسې بدل کړې چې د مرکزي ملي مشرتوب پرځای به تر خپل واک لاندې سیمو ته ځانګړې واکونه وسپاري ، روسته به د فډرالیزم سندره راتوده کړې او په پای کې به هېواد د پاشلو په لور ورسم کړې. دا بانډ یوخوا دهېواد شمال ، د روسیي د اغیز او حیاتې ګټو د سیمې پتوګه هغه هېواد ته ډالۍ کوي او بلخوا ایران سره د لوی خراسان د بیا راټوکېدو خوبونه په سرکې ګرځوي . د افغانستان د ملي تاریخ ، د هېواد د ملي ګټو او ځمکنې تمامیت په اړه پټې او زیانمنې درغلۍ او چلوټې له ځان سره په جیب کې تیارې ساتې . دا بانډ د ژبې د برترۍ نغمې غږوي ، د ملي اوسراسری ارزښتونو پرځای خپلو سمتي او قومي ارزښتونو ته ځان ژمن بولي .
دویم یا مرکزي بانډ له دولتمشر کرزي څخه راتاو شوئ چې هغې کې د هېواد نور جګړه ماران ، غله ، داړه ماران او ډاکوان راټول شوي او په تولټاکنو کې يي د هېواد پالو او بدلون پالو په وړاندې د دویم وار لپاره بیا کرزئ رامخته کړې . په دې بانډ کې پېژندل شوي داړه ماران لکه قسیم فهیم ، دوستم ، اسماعیل خان ، خلیلي ، محقق ، سیاف ، چکړې ، محسیني ، ګیلاني او مجددي ( چې دې ورځو کې يي ښای د انګریز په اشاره د کرزې په ګټه استخاره ورکړې ده ) یوځای شوي دي . دغه بانډ د هېواد په لوټولو ، چورولو او خرڅولو کې د نظارشورا او جمعیت له بانډ څخه څه کمئ نه لري . که څه هم دا بانډ نامتجانس دئ او پکې د بېلا بېلو سمتې ، قومي او مذهبي ګټو پلویان راغونډ شوي ، خو له بدلون او پرمختګ سره په دوښمنۍ کې ګډ ې موخې لري .
کرزئ غواړې ددې غلو په مټ بل پير هم د هېواد واکمن شي . کرزئ چې ددې ډاکوانو مرکزي کړۍ جوړوي ، تر اوسه يي له جګړې څخه د هېواد د ژغورون کومه لار نه ده وړاندې کړې . نړیړالې مرستې چې په تېرو کالو کې هډر لاړې ، اوس هم د کرزي او د هغه د یارانو لخوا د نوموړو مرستو د پرځای لګښت څرک نه لګیږي . تېر اته کاله يي د هېواد لپاره په اقتصادي ، سیاسي ، ټولنیز او کلتورې برخو کې نه کومه تګلار درلوده او نه يي د ملي ژوند د سمون لپاره کومه مناسبه اداره .
خو درېیم بانډ چې د هېواد په پاتې سیمو واکمني چلوي ، هغه د پردیو او اجیرو طالبانو او اسلامي ګوند بانډ دئ . دې بانډ هم له نورو څخه پښه اړولې ده . په دې بانډ کې واکمن کسان ، په هېواد کې د خیرات په پيسو جوړشوي بنسټونه او بنیادونه له منځه وړي . ښوونځي ، سړکونه ، پلونه له یو مخې الوځوي . د هېواد ملي کادرونه لکه استاد ، انجینر ، ډاکټر او نور حلالوي . د قوم سپينږیري او مشران وژني . د نجونو پر مخ تیزابونه پاشي . د وحشت او بربریت استازیتوب کوي .
دوی په ښکاره ټولټاکنې غندي خو په پټه کې ځيني کسان د خپلو استازو پتوګه د سیالۍ ډګر ته راباسي دوی هم دا کوي او هم هغه !
دوی غواړي د عربو ، وهابیانو او د ای ــ اس ــ ای پشان دوزخي سازمانونو په ملاتړ افغانستان کې د سوچه اسلامي دولت او یا اسلامي خلافت په نوم خپل واک ټينګ کړي چې د واک اصلي مرکز به عرب یا پنجاب وي او وړیا او اجیر سرتېري به يي پښتانه وي . پخپل بري سره به افغانستان له نړۍ ګوښه کړي او افغانان به د منځنیو پېړیو وحشت ته یو ځل بیا ورګوزار کړي .
که د یوې شېبې لپاره په کور دننه د ځواکونو له وضعې تېرشو او نړیوال ځواکونه چې د افغانانو له بلنې پرته خپله راغلې او هره ورځ نور هم پخپل سر راروان دي په پام کې ونیسو ، د افغانستان ناورین ځانته نور لوري او بعدونه نیسي . د ګاونډیانو اود سیمې هېوادو ګټې ، غوښتنې او شوم نیتونه هم خبره پيچلې کوي .
په داسې پيچلې او ترینګلې وضعه کې ، د هېوادپالو او بدلون پالو ځواکونو لپاره په ټولټاکنو کې د ګډون او بري خبره ځانته ځانګړې ارزښت پیدا کوي .
د ډېرو په اند ، د هېوادپالو او بدلونپالو په منځ کې غني احمدزي کولئ شي چې د یادشویو بانډونو څخه د هېواد په ژغورون او د ملي مشرتوب د منځتشې په ډکولو کې ګټور تمام شي . زه خپله اشرف غنې له نږدې نه پېژنم . خو د اشرف غني ملي تګلار او کړنلار ما هڅوي چې د هغه په ملاتړ ودریږم .
ډېرئ افغانان اشرف غني د افغانستان د ژغورون پرښته ګڼي . افغانان که چیري په ټولټاکنو کې غني ته خپل ووټ ورکړې ، خپله ملي دنده به يي ترسره کړې وي .
هغه ټول بانډونه چې دمخه یادشول ، د خپلو سمتې ، قومي او مذهبې او یا د شخصي ګټو پرته نور څه ججوره کې نه لري .
د اشرف غني په وړاندې شوې ملي تګلار کې موږ د ملي مرکزي غښتلي دولت نښې وینو . موږ به د ملي مشرتوب خاوندان شو .
د اقتصادي ودې د انډول لپاره به پلان ولرو . په کرهڼه کې به بدلون پېښ شي . بزګر به پخپل دسترخوان کې د دولت ملاتړ وګوري . د بریښنا او د اوبو د بندونو په برخه کې به هلې ځلې ګړندۍ شي . ځوانانو ته به په پاملرنه د هېواد راتلونکې روښانه وي . د خپلو روزلو صاحب منصبانو په مټ به ملي پوځ پياوړئ شي . د خپه او ګیله منو وروڼو د رضا او په واک کې د ټولو افغانانو د ګډون لپاره به د خبرو اترو دروازې پرانیستې وساتل شي . اشرف غني د نیوزویک مجلې سره پخپله روستۍ مرکه کې وايي : « زه غواړم چې لس داسې ملي پروژې عملې کړم چې د خلکو توجه ورجلبه کړي . زه غواړم چې یو ملیون نوي کارونه خلق کړم ، یو میلیون نوي کورونه جوړ کړم . زه غواړم چې په راتلونکو پنځه کالونو کې ۲۰۰۰ میلیونران خلک خلق کړم څو اوسنۍ ۲۵ شتمنې کورنۍ د ملک هر څه انحصار نه کړي . غواړم چې ۷۰۰۰۰۰ بېځایه شویو افغانانو سره مرسته وکړم . »
بلخوا د نړیوالو سره د هېواد د اړیکو سمون یو بیخچن بدلونه ته اړتیا لري . دا کار د هغه دولت چې د بېلا بېلو بانډونو د میخانیکې یووالې استازئ وي لکه د کرزي حکومت له وسې پوره نه دي بلکې ملي مرکزي دولت ته اړتیا ده .
افغانان باید یا د بانډونو پر بنسټ ولاړ سیاست ته ادامه ورکړې چې روانه وضعه ددې خبرې څرګندوی ده او یا نوئ ملي مشرتوب رامنځ ته کړي چې د افغانانو د ناورین ټولو اړخو ته ځواب ووايي . له دې کبله زه هېوادپال او بدلون پال ځواکونه چې منځنۍ کړۍ يي غني احمدزي جوړوي ، د ټولو بانډونو سره سرسختې مبارزې ته رابولم.
مرادزئ
د سختو لغتونو ماناوې :
ننګونه : چیلینج ، چالش ، سیالي
اخځونه :
بېنوا سایټ