د افغانستان سوله: پاکستان باوري ملګری او که ماهر لوبغاړی

د غونډې لومړی ویناوال د کابل پوهنتون استاد او سیاسي شنونکی ډاکټر فیض محمد ځلاند و.
ښاغلي ځلاند د پاکستان پر تاریخچه، د هند څخه یې بېلوالی، د پاکستان د زېږدنې څخه ترننه پورې د افغانستان په چاروکې د لاسوهنې، نړیوالو ته د دوکې او چل او فرېب په ورکولو او د افغانستان په سوله کې د پاکستان په رول وغږېده.
نوموړي وویل، په سیاسي مسایلو کې پر پاکستان باور کول د افغان چارواکو تېروتنه ده او دغه تېروتنه په شلمه پېړۍ کې هم افغان سیاستوالو کړې وه، چې اوسنی حکومت او چارواکي یې په یویشتمه پېړۍ کې بیا تکراروي.
ښاغلي ځلاند زیاته کړه، تر څو چې سوله افغانیزه نشي او روانه ستونزه افغانان خپلو منځونو کې حل نه کړي، دغه ستونزه هېڅوک هم نشي ختمولی.
د داعش رامنځته کول او بیا د پاکستان سره په سرحدي سیمو کې د طالبانو سره یې جګړه د پاکستان بله لوبه یاده کړه. د نوموړي په خبره، پاکستان پر طالبانو د فشار راوستو په موخه داعش رامنځته کړ، چې تر شا یې امریکا، پاکستان او د نړۍ یو شمېر نور هېوادونه دي.
ځلاند پر افغان چارواکو غږ وکړ، چې د افغانستان په سوله کې د پر پاکستان ډېر باور نه کوي او د پاکستان پر ځای دې بل کوم مسلمان هېواد منځګړی وټاکي، نه پاکستان.
د ناستې بل ویناوال د سولې د عالي شورا منشي، د پوهنتون استاد او پخوانی سناتور ښاغلی پوهنوال امين الدين مظفري و.
ښاغلي مظفري هم د سولې په برخه کې پر پاکستان ملا تړل د افغان چارواکو تېروتنه یاده کړه او له افغان چارواکو څخه یې وغوښتل، چې د پاکستان پرځای باید مخامخ له طالبانو سره خبرې وکړي.
د نوموړي په خبره، پاکستان نه کوم ګاونډي خیر دلیدلی، چې افغانستان به یې ورنه وګوري. نوموړي زیاته کړه، پاکستان ته د سولې لپاره ورتګ نه، بلکې د جګړې لپاره ورتګ دی؛ ځکه د پاکستان په تاریخ کې افغانستان ترې ښه ورځ نه ده لیدلې.
ښاغلي مظفري د تېر جهاد ثبوت وړاندې کړ، چې د روسانو پر ضد افغانانو قربانۍ ورکړې او نړیوالو سره خبرې د افغانستان په استازیتوب پاکستان کولې، چې له امله یې په هېواد کې یو کمزوری حکومت رامنځته کړ او کورنۍ جګړې پیل شوې.
نوموړي په خپلو خبرو کې وویل، کله چې په مري کې افغانان خپلو منځو کې سره کېناستل او پاکستان پردې پوه شو، چې دوی خپلو کې سره جوړیږي، نو د دویم پړاو خبرې  یې وځنډولې.
مظفري وویل، طالبان افغانان دي او ددې خاروې بچي دي او افغان حکومت دې د پاکستان پرځای د طالبانو سره مخامخ خبرې وکړي او روانې جګړې ته دې د پای ټکی کېږدي.
د یادې غونډې په ترڅ کې ځینو ګډونوالو له مېلمنو څخه پوښتنې هم وکړې، چې د مېلمنو له لوري ورته ځوابونه ورکړل شول.
د سبا فکر په کابل کې د څو با احساسه ځوانانو ټولنه ده، چې د افغانستان په روانو حالاتو غونډې کوي او په دغه غونډو کې د پوهنتون استادان، سیاسي کارپوهان راغواړي او د هغوی نظرونه نورو ځوانانو ته رسوي.