خبردار ! د افغانانو پر وړاندې دسيسه روانه ده

سياسي کړ چې په کې بيا هم عام ولس ته مرګ ژوبله واوښته. په لاريون کې د مشرانو جرګې د لومړي مرستیال محمد عالم ایزدیار د زوی محمد سالم ايزديار په ګډون اووه لاریونوال وژل شوي او تر لسو ټپیان دي. بيا کله چې د محمد عالم ايزديار د زوی د جنازې مراسم ترسره کيدل نو د جاسوسو کړيو د پلان مطابق په جنازه کې هم پرله پسې چاوندې وشوې. د ایزدیار د زوی د تدفین په مراسمو کې هم د چاودنو له امله د لومړنیو معلوماتو له مخې ۱۸ کسان وژل شوي او ګڼ نور ټپیان دي.‌
اوس خلکو او ټول ولس ته جوته شوې چې د تيرې چهارشنبې د ورځې خونړی بريد، بيا د حکومت پر ضد لاريون چمتو کول او په لاريون کې هم مرګ ژوبله او بيا د ښاغلي ايزياد د زوی د جنازې په مراسمو کې پرله پسې بريدونه يو له بل سره تړاو لري او ټول د يوې ځانګړې کړۍ کار دی. څو پلورل شويو څيرو د منظم پلان له مخې د افغانانو تر منځ د بې تفاقۍ، تعصب او بدبينۍ پروژه پيل کړې ده. تيره ورځ هم دغو پلورل شويو څيرو چې ځينې يې پخپله د دولت او حکومت جز دي؛ تيره ورځ هم هڅه وکړه چې د لاريونوالو له احساساتو په استفادې لاريون په کودتا بدل او په اوسمهال کې نيم ژواندی حکومت راوپرځوي.
دوی څو ډلې دي. يوه هغه ډله ده چې په دنده کې د خپلو بې کفايتيو او ناوړه استفادې له امله د اشرف غني له خوا له دندو وشړل شول او دولتي امکانات پرې قطع شول. کله چې دوی له خپلو دندو څخه د خپلو ناغيړيو او له دندې څخه د ناوړه ګټې اخيستنې له امله وشړل شول نو دومره زور يې ورکړ چې حتی د قومي جنګونو د پیل خبرداری يې ورکړ. دا هغه ډله ده چې اوس د خپل دولتي موقف د لاسه وتلو له امله له حکومت يې سره دښمني اعلان کړې ده او د ولسمشر غني د استعفا غوښتنه کوي. دغه ډله اوس له هرې لارې کوښښ کوي چې پر حکومت فشار راوړي او يا د حکومت پر وړاندې د خلکو احساسات راوپاروي. دوی په ولس کې دومره منفور شوي څېرې دي چې څه موده وړاندې يې د حکومت پر ضد لاريون ترسره کړ خو په لاريون کې پرته له ديرشو هغو کسانو څخه چې دوی په کرايه نيولي و؛ نور د ولس له منځه هيچا ګډون ونه کړ. دوی پوهيږي چې په يواځې ځان په دوی نور ولس نه راټوليږي نو ځکه يې د تيرې ورځې له لاريونوالو د خپلو شومو موخو د ترلاسه کولو لپاره کار واخيست.
بله ډله هغه څوک دي چې د افغانانو تر منځ د بې تفاقۍ، بدبينۍ، دښمنۍ، تعصب او تبعيض اچولو د پروژو سرلاري او پلي کوونکي دي. دا ډله هغه څوک دي چې د پاکستان او ايران په اشاره د هغوی ګټې خوندي کوي. هغه ډله ده چې خوري او څکي د افغان دولت، خو هګۍ د پاکستان او ايران لپاره اچوي. دوی هغه څوک دي چې څه موده وړاندې يې د هيواد ستر قوم د يووالي او ډيرښت له امله يې د ډيورنډ کرښې د رسميت او د هيواد ستر قوم په منځ د دوه ځايه کيدلو لپاره له حکومته غوښتنه وکړه چې ډيورنډ کرښه په رسميت وپيژني. دوی هغه څوک دي چې د افغانان ولس د ذليله کولو او د افغانستان د وروسته پاتې کيدلو لپاره پرې د ايران او پاکستان لخوا پانګونه شوې ده. دوی د همدې لپاره ګومارل شوي چې فرصت ته په کتو هرې ستونزې ته قومي، سمتي، ژبني او مذهبي رنګ ورکړي او د قومونو، سمتونو او مذهبونو تر منځ درز واچوي.
که څه هم د افغانانو تر منځ د واټن رامنځ کولو او په افغانستان کې ميشت قومونه په يو له بل سره په دښمنۍ اچولو پروژه له وړاندې د ځينو مزدور څېرو پر مټ پلي کيدونکې ده؛ خو د ملي يووالي نيم ژواندي حکومت پر مهال په ځانګړې توګه د تيرې اونۍ راهيسې دغه پروژه په ډيره چټکۍ پلي کيدونکې ده. اوس ځانګړې کړۍ د يو واحد هدف لپاره سره يو ځای شوي دي او پيل يې د حکومت پر ضد د خلکو د احساساتو له پارولو کوي. که خدای مه کړه د دوی دغه پروژه پلي شي نو پرته له شکه ورپسې بيا د قومونو او مذهبونو تر منځ به د نفاق لمبې بلې شي.
پس لازمه او اړينه ده چې ولس په ځانګړې توګه ځوانان مو د دښمن له دغې دسيسې خبر واوسي او خپل مسوليت د قومونو او ولسونو د اتفاق لپاره ترسره کړي. ځوانان مو بايد د نورو پلورل شويو کړيو د  سياسي موخو ښکار نه شي. په اوسنيو حساسو شرايطو کې مو له ټولو ځوانانو په ټوله کې له ټول ولس نه غوښتنه ده چې په پوره دقت او تحليل سره ګام پورته کړي او هڅه وکړي د قومونو او ولسونو تر منځ اتفاق او يووالی وساتي. که ځوان قشر مو د تعقل پر ځای له احساساتو کار واخلي نو پرته له شکه چې د افغانانو د دښمن شوم پلان به پلی او ا فغانان به يو ځل بيا د نفاق د لمبو قرباني شي.
 د واحد افغان ولس او واحد افغانستان په هيله
ليکنه خوشحال آصفي