جنرال دوستم دې له امنیتي ځواکونو ځارېږي!

نوموړي دا ځل هم لاپې وهلې او ویل یې که واک ورکړل شي، نو په شپږ میاشتو کې به د طالبانو نوغی وباسي، مګر د طالبانو کمین سره چې په لاره کې مخ شو، که امنیتي ځواکونه نه وای ور رسېدلي، نو نږدې وه چې د جنرال دوستم نوغی وباسي.

جنرال دوستم لا هم د بدنام جنګسالار په توګه شهرت لري او لا هم خلک د ده د وېرې او ډار له امله په ده ور ټول دي او فکر کوي چې هغه د ازبکانو محبوب مشر دی، مګر په حقیقت کې هغه یو بې رحمه دیکتاتور دی او خلک د خپل سر، مال او کورنۍ د خوندیتوب په موخه د هغه په خلاف حتی خوله هم نشي چوله کولی.

جنرال دوستم چې له مودو پس د هیواد مزار شریف ښار ته راستون شو او په مزار کې یې یوې غونډې ته خبرې کولې چې د هیواد په ګوټ ګوټ کې به د طالبانو پټنځایونه په نښه کوم، جګړه به ورسره کوم هغوی به ځپم او له هیواده به یې د تل لپاره ريښه ورکه کړم. او د افغان ولس نه دغه ستر سر دردی ورکوم چې نور په ارامۍ او خوشحالۍ سره خپل ژوند له خپلو کورنیو سره تېر کړي. ښاغلی دوستم وايي چې د طالبانوماتول دومره سخت کار ندې ځکه چې هغه خو له مونږه نه زیات امکانات نه لري پرمختللې وسلې ورسره نشته کومې چې له مونږه سره دي. نو د دې ډلې ماتول زما لپاره ډېر اسانه کار دې. او که چېرته مې یاده ډله په شپږو مياشتو کې د هیواد له ګوټ ګوټ څخه لرې نکړه. زما نوم به هم دوستم نه وي او بیا راشي مخ مې را تور کړئ. او د تل لپاره به هیواد هم پرېږدم.

د ښاغلي جنرال دوستم د همدغو خبرو تر سره کولو وروسته له مزار شریف ښار شبرغان ته پر لاره و، چې د وسلوالو طالبانو په کمین کې راګير شو. خو ښاغلی دوستم د امنیتي او دفاعي ځواکونو پر مټ له بریده ژوندی راووت. د طالبانو د داسې کار په تر سره کولو سره د جنرال دوستم غوصه نوره هم راوپاروله. ښاغلي دوستم وویل چې یوازې افغان حکومت راته د دې اجازه راکړي چې طالبان ختم کړه. بیا به تاسې هم وګورئ چې پر طالبانو رڼا ورځ توره شپه کومه او کنه.

د جنرال دوستم له ګواښونو او په کمین کې له ایسارېدو داسې ښکاري چې خبرې او عمل نهایت توپیر لري. د جنګ شدت او سختي تر بل هر چا زموږ امنیتي او دفاعي ځواکونو ته زیات ورمعلومېږي. د جنرال دوستم په ګډون ټول باید د خپلو امنیتي او دفاعي ځواکونو قدرداني وکړي.