پاکستاني پوځ به عبرت اخیستی وي!

.

د سرحدي سیمو اوسېدونکو تل د وطن او خلکو په دفاع او ساتنه کې مهم رول لوبولی دی او په دې برخه کې یې نه ستړې کېدونکې هلې ځلې کړې دي. له هیواد سره د دوی مینه او وطن پالنه یې واقعاً د قدر وړ ده. حتی د امیر عبدالرحمن خان په وخت کې هم څو ځله انګلیسانو امیر ته له دې شکایت وکړ چې غازي ببرک خان او د ده سرتېري زموږ په چوڼیو بریدونه کوي، خلک مو را وژني او موږ ترې تر پوزې رسېدلي یوو. پرون که انګرېز په سرحدي سیمو کې د یو قدم د رامخته کېدو جرئت نه درلود او غازیانو ورباندې برید کاوه، نن د همغو غازي نیکونو وطن پاله اولادونو پاکستاني پوځ ته دا وښوده چې افغان ولس او افغان خاورې ته دې په کمه نه ګوري او که ورته وګوري، نو دغسې به یې مړي زموږ پر پاکه خاوره پاتې وي، دوی به شرمېدلي او تښتېدلي پاکستان ته ستنېږي او بندیوان او ټپیان به یې له افغان ولس سره برمته پاتې وي.

هغه مهال ځینو پاکستاني رسنیو وویل چې د دوی له پوخ سره د کرمی پښتانه هم یو ځای شوی ول تر څو د افغان حکومت په مقابل کی وجنګیږی . پوښتنه دا ده چی د ډیوریډ پوری غاړی پښتانه ولی د افغان حکومت په مقابل کی وسله راواخیسته ؟

دلیل یې دادی چې د پاکستان پالیسي د خلکو او قومونو جنګول دي، دوی غواړي د جنګولو له پالیسۍ څخه د ځان لپاره ګټه واخلي او په دې ډول د ډیورنډ کرښې دواړو غاړو ته پراته قومونه په خپلو کې سره بدبینه کړي.

د پاکستان پوځ په جوماتونو کې د ملاامامانو له لارې اعلانونه وکړل او خلکو ته یې وویل چې داعشیانو برید کړی او دلته د راتګ او د خلکو د وژلو پلان لري. هغوی ته یې داعش د اسلام په نوم د امریکا له خوا جوړه شوې پدیده ده او غواړی چی اسلام بدنام کړي. د داعش په واسطه امریکا غواړی چی اسلامی هیوادونه نا امن کړی او امریکا د داعش د ختمولو په نوم باندی پاکستان ته راشی او پر مونږ باندی حکومت وکړی د همد له امله ملاامامانو په خپلو خطبو کې وویل چی د دغه خطر او تهدید د دفعه کولو لپاره باید موږ وسله واخلو او همغه و چې خلک یې د وسلې اخیستلو او جنګولو ته وهڅول.

حتی خلکو ته یې داسې تبلیغات هم کړي د افغانستان او پاکستان  تر منځ  چې کومه جګړه یا جنګ دی، هغه د افغانستان او پاکستان فوځونو تر منځ نده، بلکی هغه د هندوستان ، امریکا او پاکستان تر منځ جګړه ده پاکستان ته هندوستان او امریکا یو ځای شوی او له ډیر وخت نه غواړی چی پاکستان تر خپل تسلط لاندی راولی.