خپلواک ولي استعفا وکړه؟

له تېرو څلورنیمو کلونو را په دې خوا خپلواک د هېواد چور ته بډې وهلې وې او تر نن پورې یې بېحده غلاوې وکړې چې تر ډېره بریده یې په حکومت کې د کمېشنکار په نوم شهرت درلود. دلالي، مخکښو سیاسیونو ته توطیې جوړول، د قومونو په ځانګړې توګه د پښتنو تر منځ اختلافاتو ته لمن وهل یې نورې هغه دندې وې چې تر نن پورې یې په پوره ایماندارۍ ترسره کړې دي.

اوس چې د ولسمشر غني د واکمنۍ وروستۍ سلګۍ دي او غلاوې هم وروستۍ مرحلې ته رسېدلې، د استعفا په نوم غواړي ځان لکه سپینه مرغۍ داسې پاک وښيي، خو خبر نه دی چې د اوسني نظام تر ټولو پلیته او سپکه څېره دی خپله دی. د دې هېواد اصیل بچي چې تاسو یې د وینو پر سر لوبې وکړې، د کونډو، یتیمانو حقونه مو وخوړل او د سولې په نامه مو په بېلابېلو بهانو پیسې غلا کړې او د دوی عزت مو وپلوره، اداره مو ټوټې ټوټې کړه، د پرمختګ پر ځای مو هېواد شاتګ ته سوق کړ، د هېواد د وروڼو قومونو تر منځ مو نفاق رامنځته کړ او په ټوله کې د پښتنو قومونو تر منځ مو چې کومه بې اتفاقي راوسته، هېڅکله به مو ونه بښي.

تېر کال داسې راپورونه خپاره شول چې ولسمشر غني د خپلو ورځنیو غلاوو شریک خپلواک ته امر کړی چې هره ورځ سل زره ډالر د ټاکنیز کمپاین لپاره پیدا کړي. خپلواک چې اصلي دنده یې د ولسمشر کمېشنکاري وه، هره ورځ په مختلفو بهانو پیسې ټولولې او نن چې د کمپاین وخت را ورسېد د ځان د پاک والي په پار یې هم خپله دنده خوشي کړه او هم یې د مظلوم ملت په میلیونونو ډالر په بډه ووهل.

په پای کې د افغانستان له اعظیم ولس څخه غواړو چې ټول سره یو شي او د خپلواک د غلاوو او دوسیو د څېړنې غوښتونکي شي، کومې غلاوې چې د ولس په نامه خپلواک په بډو وهلې دي، د هېواد په تاریخ کې یې ساری نشته؛ که چېرې ولسمشر واقعاً د فساد پر وړاندې جدي مبارزه کوي او له خپلواک سره په ورځنیو غلاوو کې شریک نه وي، نو اړینه ده چې نوموړی د محاکمې مېز ته را کش او د ولس د حقونو په تړاو ترې پوښتنه وشي.