«دنیا»

انجنیر زلمی نصرت
دنمارک

څو دې توان رسي د خلکو مددگار شه
د الله (ج)رضا لپاره رستگار شه

په چوکۍ مال او دولت کې عزت نشته
که عزت غواړې د زړونو خریدار شه

که ریښتیا د و طن مېنه ستا ایمان وي
بیا  د سولې په دفاع کې استوار شه

تعصب نشته په اسلام کې که پوهیږې
د تعصب سره په جنگ شه پرهیزگار شه

انس و جن ټول پیدا کړی پاک الله دی
په هر ځای کې انسانیت سره سازگار شه

که تحفه غواړې عقبا کې له دنیا نه
دې دنیا کې د انصاف بیا طرفدار شه

که نصرت غواړې په دین او په دنیاکې 
د انسان او انسانیت د باغ ملیار شه.

۲۰۲۱ کال د جون ۲۱ مه نیټه

زلمی نصرت

دنمارک
د وایلی ښار