وروستي مطالب

د امریکا لخوا دپاکستان په مرستو ودرؤلو څیړونکي څه وایي؟

شنبه, 31 سرطان 1396 16:23

دپاکستان لخوا د ترهګرې حقاني شبکې په ضد د ګامونو نه اخستل کیدو له امله امریکا پاکستان ته دپینځوؤ کروړو ډالرو ورکړی کیدونکې مرستې ودرولي خو څیړونکي وایي پاکستان ته به دا ثابتول ګران وي چې ګنې دوئ دحقاني شبکې په ضد ریښتوني ګامونه اخلي.

تیره ورځ د امریکایي پینټاګان ویاند ایډم اسټمپ مطبوعاتو ته ویلي وؤ چې ددفاع وزیر جم میټس د امریکایي کانګریس دفاعي کمیټو ته ویلي،ددې خبرې پخلی نه شي کولی چې ۲۰۱۶م مالي کال دپاره پاکستان ته دامریکا لخوا د ائتلافي مرستو په نوم کومې پیسې ورکړل شوي هغه یې دترهګرو په ضد جګړه کې لګولي یایې دحقاني شبکې دجنګیالو په ضد کوم ګټور ګامونه اخستي دي.

امریکې دترهګرۍ په ضد جګړه کې دمرستو دپاره پاکستان ته۹۰ کروړه ډالر بیل کړي وؤ چې هغې کې ۵۵ کروړه ډالر پاکستان ترلاسه کړي هم دي .

د امریکې وینا ده پاکستان سره اوس هم وخت شته چې دحقاني شبکې په ضد ګامونه واخلي.

افغانستان له جرمني وغوښتل چې د هلمند په لیتیمو څیړنه وکړي

پنجشنبه, 22 سرطان 1396 20:47

جمهور رئیس‌ محمد اشرف غني د خپل جرمني سیال غوښتي چې د جرمني د موټر جوړولو کمپنۍ دې د هلمند د لیتیمو په کانونو څیړنې وکړي چې څنګه د موټر جوړولو په صنعت کې ورنه استفاده وشي.

د جرمني جمهور رئیس والتر شتاین مایر افغانستان ته د یو نا اعلان شوی سفر په پیل کې مزار شریف ته تللی و.

جمهور رئیس غني په یوه اعلامیه کې ویلي دي چې د لیتیم کانونه د افغانستان په جنوبي ولایتونو کې د لوړ کیفیت لرونکي دي او خپل جرمني سیال ته یې وړاندیز کړی دی چې "د جرمني د موټر جوړولو کمپنۍ په دې هکله څیړنې وکړي چې ددغو کانونو نه څرنگه د موټر جوړولو په صنعت کې استفاده وکړي".

د جرمني جمهور رئیس ډاډ ورکړی دی چې د افغانستان د لیتیم کانونو د مدیریت او استفادې په برخه کې به غور وکړي چې څنگه جرمني کمپنۍ په دې برخه کې همکاري کولای شي.

ښاغلی شتاین مایر د خپلې میرمنې په ملتیا افغانستان ته تللی دی. جرمني د ناټو د قاطع ملاتړ په ماموریت کې شاوخوا ۹۸۰ سرتیري لري چې زیات شمېر یې په بلخ ولایت کې دیره دي.

غني: د قومي ډلبندیو له پټې نابودۍ سترګې نه شو پټولی

یکشنبه, 18 سرطان 1396 20:07

موږ نه شو کولای له هغې غلې نابودۍ سترګې پټې کړو چې له قومي ډلبندیو سرچینې اخلي
افغان ولسمشر محمد اشرف غني وايي، په افغانستان کې قومي نارضایتي ډېره پېچلې، خو د درک وړ ده چې د تېر مهال له ناپامۍ او تبعیضي چلنده سرچینه اخلي.
افغان ولسمشر چې نن یکشنبه د چنګاښ ۱۸مه د افغانستان د همغږۍ او څارنې له پلاوي (JCMB) سره په غونډه کې خبرې کولې، وویل، په افغانستان کې د نارضایتۍ احساس ورځ تر بلې قومي بڼه غوره کوي:
"موږ نه شو کولای له هغې غلې نابودۍ سترګې پټې کړو چې له قومي ډلبندیو سرچینې اخلي. بې پروا مشران او هغوی چې ملي ګټي له خپلو شخصي ګټو قرباني کوي، کولای شي ټولمېشته (پلورالیسټه) ټولنه کې لاس ووهي، خو موږ هیڅکله د دغسې یوه کار اجازه نه شو ور کولی."
هغه زیاته کړه، دولت د دغو زهرو پاشل کېدو ته اجازه نه شي ور کولی. د خلکو د مشورو اخیستلو لپاره به یو ملي بحث ته چې د خلکو اندېښنې پکې په نښه شي، جوړ کړي چې له هغوی سره ازادې خبرې وکړي او په ټولیزه توګه هېواد له ډلبندي کېدو وژغوري.
ښاغلي غني ژمنه کړه، چې په دې برخه کې به تر نورو لومړی دولتي کارکوونکي چې د حکومت تر ولګې لاندې دي، تر څېړنې لاندې ونیسي چې ډاډمن شي په افغانستان کې له ټولو قشرونو سره عادلانه چلند کېږي.

ارګ: د حقاني او نورو تروریستي ډلو مرکزونه په پاکستان کې دي

جمعه, 16 سرطان 1396 20:54

ارګ، د افغان حکومت له کنټرول بهر سیمو کې د حقاني ډلې په ګډون د تروریستي ډلو د مرکزونو د شتون په هکله د پاکستان د بهرنیو چارو وزارت د ویاند څرګندونې بې اساسه وبللې.

د افغانستان جمهوري ریاست، د پاکستان د بهرنیو چارو د وزارت د دې ادعا په هکله، چې د داعش، تحریک طالبان افغانستان، تحریک طالبان پاکستان، جمعیت الاحرار، القاعدې ډلې پاتشونې او نورې تروریستي ډلې د افغان حکومت له کنټرول څخه په بهر سیمو کې ځای په ځای شوي او فعالیت کوي، بې اساسه ادعا بللې او ویلي دي چې ټوله نړۍ په دې پوهیږي چې دا ډلې چیرته مرکزونه لري.

د افغانستان د جمهوري ریاست د ویاند مرستیال دواخان مینه پال امریکا غږ ته وویل چې ټول په دې پوهیږي چې د پیښور شورا، د کویټې شورا، د میرانشاه شورا او حتی د کراچۍ شورا د پاکستان په خاوره کې د دغه هیواد پوځ په ملاتړ فعالیت کوي.

ښاغلي مینه پال وویل " نړۍ دې پایلې ته رسیدلې چې تروریستان د پاکستان څخه ملاتړ ترلاسه کوي او په دغه خاوره کې میشت دي او پاکستان باید د تروریستي ډلو پر وړاندې عملي او صادقانه عملیات وکړي ".

ښاغلي مینه پال وویل چې افغان حکومت سره چې کوم اسناد شته دا ښيي چې د حقاني ډله هم خپل ټول عملیات د پاکستان له خاورې د دغه هیواد د پوځ په ملاتړ ترسره کوي.

د امريکا او روسيې ولسمشرانو مخامخ خبرې وکړې

جمعه, 16 سرطان 1396 20:47

د امريکا ولسمشر ډونالډ ټرمپ نن له خپل روسي سيال ولاديمير پوتين سره د اول وار لپاره مخامخ وکتل.

د جرمني په هامبورګ ښار کې د نړۍ د شلو سترو اقتصادلرونکو هېوادونو يا G-20 د سرمشريزې په څنډه کې دواړه مشران په داسې حال کې د اول وار لپاره سره مخامخ خبرې کوي، چې په وروستيو کې د دواړو هېوادونو اړيکې سړې شوي دي.

د امريکا ولسمشر ډونالد ټرمپ او د روسيې ولسمشر ولاديمير پوتين مخامخ په داسې حال کې ګوري، چې د دواړو هېوادونو ترمنځ په اړيکو کې کړکېچ زيات شوى دى.

ولسمشر ټرمپ ويلي، له پوتين سره د ګډ کار د لارې چارې د لټولو هڅه کوي.

خو په سوريه او اوکراين کې د روسيې د اقداماتو او د امريکا د جمهوري رياست په تېرو انتخاباتو کې د روسيې د لاسوهنو د ادعاوو له کبله ولاړو شويو اختلافاتو دغه هدف ته رسېدل ګران کړي دي.

ښاغلي ټرمپ هڅه کړې چې له پوتين سره د ځينو مسايلو په برخه کې ګډ توافق ته ورسېږي، لکه د سوريې جګړه، د اوکراين ناحل شوې شخړه، انټرنټي حملې، د شمالي کوريا د باليستيک توغنديو ازموينې او د ټروريزم په وړاندې مبارزه.

د افغان مېرمنې په جنسي ځورونې تورن پاکستانی افسر نیول شوی

جمعه, 16 سرطان 1396 20:41

رحمان الله 
ګڼ شمېر افغانان پاکستان ته د درملنې، سوداګرۍ او کورنۍ لیدو لپاره ځي.
د پاکستان د پلټنې د مرکزي ادارې، اېف ای اې په وینا هغه افسر چې د اسلام آباد په هوایي ډګر کې پر یوې افغان مېرمنې په لاس اچونې تورن دی، نیول شوی دی.
دغه پېښه وروسته له دې چې د ځایي رسنیو او ټولنیزو شبکو له خوا رپوټ شوه، د چارواکو تر غوږو ورسېده.
د دغه افسر دندن ځنډول شوې.
رپوټونه وایي چې د پاکستان د کورنیو چارو وزیر چودري نثارعلي خان امر کړی چې دغه افسر ته دې دوسیه واچول شي او د پېښې په اړه دې پلټنې وشي.

واشنګټن پوسټ: افغانستان کې سیاسي توپان جوړېدونکی دی؟

دوشنبه, 12 سرطان 1396 20:53

"له دې چې د یو شمېر قومي اقلیتونو مشرانو له ولسمشر اشرف غني سره پرېکون اعلان کړ او د اصلاحاتو او د مظاهرو خبرې کوي، برېښي چې په افغانستان کې سیاسي توپان جوړېدونکی دی."

دا په افغانستان کې پر سیاسي وضعیت د واشنګټن پوسټ ورځپاڼې د افغانستان او پاکستان د دفتر د مشرې، پامېلا کانسټبل د وروستۍ مقالې سرلیک دی.

کانسټبل په دې مقاله کې لیکلي:

د افغانستان د درېیو عمده قومي اقلیتونو د ګوندونو مشرانو چې ټول د اشرف غني په حکومت کې لوړې چوکۍ لري، له ترکیې خپل ائتلاف اعلان کړ، د اصلاحاتو لپاره د غوښتنو یو لېست یې وړاندې کړ او خبرداری یې هم ورکړ چې که يې غوښتنې ونه منل شي، مظاهرې به وکړي.

د کانسټبل په لیکنه، دا حیرانونکی ائتلاف په کابل کې تر خونړیو تروریستي حملو او چاودنو، سیاسي بحران او مظاهرو وروسته اعلان شوی دی.

د دې د ائتلاف غړي، ملېشه ډلو هغه پېژندل شوي مشران دي چې یو وخت په خپلو کې جنګېدل، سرسخت رقیبان وو او د اشرف غني حکومت ته جدي ګواښ پېښولائ شي.

'د کندهار والي پر میلمستون برید پاکستان کې پلان شوی و''

پنجشنبه, 25 جوزا 1396 21:46

د ملي امنیت رییس په وینا هغه برید کې دوه خورا زورور بمونه کاروول شوي وو
د افغانستان ملي امنیت ادارې رییس معصوم ستانکزي د کندهار د والي په دفتر کې د کال په لومړیو کې د بمي چاودنې د پلټنې د بشپړېدو خبر ورکړی.
هغه وویل چې د کورنیو او نړیوالو پلټونکو پایله داده چې برید طالبانو کړی او په پاکستان کې یې پلان کړی دی.
نوموړي یوې خبرې غونډې ته وینا کې ویلي، د هغو څېړنو پایله کې، چې افغان حکومت د امریکا استخباراتي ادارې ایف بي ای، برتانوي سکاټلنډ یارډ او عربي متحدو اماراتو د ترهګرۍ ضد چارواکو سره په ګډه تر سره کړي، معلومه شوې، چې دغه برید د میلمستون اشپز د خپل همکار په مرسته تر سره کړی دی.
د روان میلادي کال په لومړیو کې د کندهار هغه مهال والي همایون عزیزي په میلمستون کې هغه مهال چاودنې شوې وې، چې د متحدو عربي اماراتو سفیر جمعة محمد عبدالله الکعبي او یو شمېر لوړ پوړي چارواکي او دیپلوماتان د نوموړي میلمانه وو.