د هند بهرنیو چارو وزارت په افغانستان کې د طالبانو حکومت دا پرېکړه ستایلې او "مثبت بدلون" یې بللی چې وايي د هندوانو او سیکانو غصب شوې ځمکې ورته راګرځوي.

د هندي رسنیو رپوټونو کې راغلي، چې د دغه هېواد بهرنیو چارو وزارت ویاند راندیر جیسوال د جمعې پر ورځ د خبري کنفرانس پر مهال د یوې پوښتنې په ځواب کې ویلي، "موږ په دې تړاو رپوټونه کتلي دي. که د طالبانو ادارې پرېکړه کړې وي، چې د خپلو هندو او سیک ټولنې د وګړو د مالکیت حقونه راوګرځوي، دا یو مثبت بدلون ګڼو."

د طالبانو په حکومت کې د ځمکو د غصب مخنیوي او د غضب شویو ځمکو راګرځولو کمېسیون تېره میاشت په کابل او ولایتونو کې خپلو تخنیکي پلاوو ته امر وکړ چې د هندوانو او سیک هېوادوالو غضب شوې او هغه ځمکې تشخیص او مالومې کړي، چې د جعلي وکالت خطونو په وسیله یې د غصبېدو امکان موجود وي.

دغه کمېسیون ویلي چې د هندو باوره هېوادوالو د ځمکو د غصب موضوع په "بشپړ غور" څېړي او که غصب شوې سیمې تثبیت شي، نو "خپلو اصلي مالکانو ته به راوګرځول شي."

"موږ افغانان یو"
کابل 
هند د ۲۰۲۲ کال جون میاشت کابل کې سیکانو پر یوه درمسال د داعش له مرګوني برید وروسته اعلان وکړ چې د افغانستان سلګونو سیکانو ته "بېړنۍ" ویزې ورکوي.

هندوان او سیکان له پېړیو راهیسې افغانستان کې اوسېدلي او دغلته پلرنۍ ځمکې او جایدادونه لري.

تر اویایمې لسیزې او جګړو مخکې د افغانستان بېلابېلو ولایتونو کې شاوخوا ۲۵۰ زره هندو او سیک کورنیو ژوند کاوه.

له کورنیو جګړو سره د ګڼو نورو زیانګالو افغانانو په څېر د دوی کډوالي هم پیل شوه.

کله چې طالبان د ۲۰۲۱ کال په اګست کې بېرته واک ته راګرځېدل، نو په ټول افغانستان کې له ۳۰۰ کم سیکان پاتې وو.

رپوټونه وايي اوس دا شمېر ۱۵۰ ته راکښته شوی او په تېرو شاوخوا دوه نیمو کلونو کې لسګونه نور سیکان هم وتلي دي.

د افغانستان هندو او سیک وګړي تېرو څو کلونو کې په وار وار د داعش خراسان څانګې لخوا د مرګونو بریدونو هدف ګرځېدلي.

د جمهوریت پر مهال د افغانستان پارلمان کې د هندو او سیک ټولنې یوې استازې انارکلي هنریار د دوی پر عبادتځي تر برید وروسته وویل " افغان هندوان اوسیکان د دې خاورې اصلي اوسېدونکي دي. یو شمېر هېوادوال وايي چې هندوان او سیکان د کابل او نوي ډیلي ترمنځ د نویو اړیکو له کبله د بریدونو هدف ګرځي. زه افغانه یم، موږ افغانان یو. له ویزې پرته او یا د ویزې له پای ته رسېدو وروسته ان هند کې د پاتې کېدو اجازه هم نه لرو. خو بیا هم د هند ټاپه راباندې لګول کیږي."

د ایران پوځ په سیمه ایز وخت شنبه اپریل ۱۳ (وري ۲۵) ناوخته ویلي چې د ایران پوځ د دې هیواد په لور بې پیلوټه یا ډرون الوتکې توغولي دي.

د پوځ ویاند دانیال هاګاري په یوې اعلامیې کې ویلي چې دا الوتکې د ایران د خاورې څخه توغول شویدي.

ویاند ویلي چې د متحده ایالاتو او نورو شریکانو سره په ګډه کار کوي چې د دې بریدونو پر ضد اقدام وکړي او شنډې یې کړي.

سپینې ماڼۍ په یوې اعلامیې کې ویلي چې د ملي امنیت ټیم په منظمه توګه جمهور رئیس جو بایډن ته معلومات ورکوي. په اعلامیې کې همدارنګه ویل شوي چې د جمهور رئیس ټیم د اسرائیل او نورو متحدینو او شریکانو سره په دوامداره توګه په اړیکې کې دي.

په اعلامیې کې یو ځل بیا د اسرائیل سره د متحده ایالاتو د نه "بدلیدونکي ملاتړ " یادونه شوې او پکې ویل شوي چې "متحده ایالات به د اسرائیل ولس سره ولاړ وي".

غبرګونونه:

د بریتانیې صدراعظم ریشي سوناک په اسرائیل د ایران د بې پیلوټه یا ډرون الوتکو توغیدل غندلي دي او د اسرائیل د امنیت د دفاع ډاډ یې ورکړی.

د بریتاینې مشر په یوې اعلامیې کې ویلي، " مونږ د خپلو متحدینو سره یو ځای په عاجله توګه د وضعیت ثابتولو لپاره کار کوو چې د کړکیچ پراخیدو مخه ونیسو. هیڅوک د وینې نوره تویدونه نه غواړي".

د طالبانو مشر مولوي هبت الله اخوندزاده په خپلې اختریزې وینا کې پر خلکو غږ کړئ چې د اوسني نظام ملاتړ وکړي او په وینا یې خپل هېواد او اقتصاد خپله جوړ کړي.

نوموړي یو ځل بیا ټینګار کړی چې د ده په ټکو له اسلامه نه تېرېږي او "حدود به پلې کوي."

هغه په خپله نژدې نیم ساعته وینا کې بیا بیا هڅه کوله د بشري حقونو په اړه د خپلو پرېکړو دفاع وکړي او ټینګار یې دا و چې د ده په ټکو "شریعت" پلی کوي، داسې حال کې چې ګڼ نړیوال بنسټونه یې له بشري حقونو سره په ټکر بولې.

د طالبانو مشر ملا هبت الله اخند خلک یووالي ته وربللي او وايي چې د دوی ملاتړ دې وکړي، دغه راز پر طالبانو یې غږ کړی چې خلک خپل کړي، "دا مجاهدین دې هم خپل خلک داسې بولي، چې له دوی سره په سنګر کې شریکان دي، له دوی سره په امارت کې شریکان دي. موږ ته تاسو کافي یاست. نور چا ته ضرورت نشته، خپل ملک مو خپله جوړ کړئ، خپل نظام خپله جوړ کړئ او خپل اقتصاد مو خپله جوړ کړئ. خپله ځانونه خود کفا کړئ."

خو نوموړي دا نه دي ویلي چې له خپلو سره خبرې کوي او که نه. مخکې طالب ویاندویانو بي بي سي ته ویلي وو چې د طالبانو حکومت مخالفانو سره خبرو ته اړتیا نشته.

د طالبانو ویاند ذبیح الله مجاهد په خپله اېکس پاڼه لیکلي، نن د کندهار په مرکزي عیدګاه کې د کوچني اختر لمونځ د مولو هبت الله اخوندزاده په امامت ادا شوی دی.

ښاغلي هبت الله پرته له دې چې کوم ځانګړي شخص ته اشاره وکړي، وویل چې په خپلو منځونو کې دې له اختلافونو څخه ډډه وکړي.

"یو بل سره نژدې شئ او مینه او محبت پیدا کړئ. خپلو منځونو کې جوړې وکړئ، سوله وکړئ او بدۍ ورکې کړئ. له زړونو مو کینې او حسد وباسئ او یو بل ته بښنه وکړئ. له یو بل سره به په اختلاف او ټکر کې راځئ، نن یې ورځ ده چې تاسو عفوه وکړئ. هر چا چې ستاسو پر حق تېری کړئ، نن بښنه ورته وکړئ."

دا وروستیو کې د نجونو د زدکړو او د ښځو د کار په اړه د طالب مشرانو نظرونه سره وېشلې ښکاري.

د طالبانو مشر خپل جنګیالي یو ځل بیا د جګړې لپاره تیارئ ته وروبلل او وايي، باید قربانیو ته تیار اوسي، "لکه پرون مو چې په سختي کې استشهادي کوله، فدایانې مو کولې د کامیابۍ لپاره، نن په راحت کې دغسې قربانۍ ورکړئ، شا ته نه شئ، کمربند مات نه کړئ."

هغه زیاته کړه، "افغانان پر اسلام معامله نه کوي، چې کولای یې پرون به یې کړې وه، په لکهاوو شهیدان به یې نه ورکول. کورونه یې ولې خرابول؟"

هغه یو ځل بیا ټینګار وکړ چې له شریعت به یو قدم هم تېر نه شي.

مولوي هبت الله اخوندزاده د خپلو خبرو په ترڅ کې د نجونو ښوونځیو د بیا پرانیستل کېدو او د ښځو د حقونو کومه یادونه ونه کړه.

څه باندې دوه نیم کاله کېږي چې طالبان بیا پر افغانستان واکمن شوي، خو تر اوسه یې یوه هېواد هم حکومت په رسمیت نه دی پېژندلی.

نړیوالې ټولنې د طالبانو رسمیت پېژندنې لپاره ځینې شرایط وړاندې کړي، چې طالبان یې منلو ته زړه نه ښه کوي.