"د ملګرو ملتونو د امنیت شورا غړي افغانستان ته ځي"

"د ملګرو ملتونو د امنیت شورا غړي افغانستان ته ځي"

واشنګټن پوسټ ورځپاڼه په یو مطلب کې لیکي چې د ملګرو ملتونو امنیت شورا مشر پرون (پنجشنبه) وویل د امنیت شورا د غړو هېوادونو چارواکي غواړي له افغانانو سره د یووالي د څرګندولو په خاطر افغانستان ته سفر وکړي.

دوی به له افغان دولتي چارواکو سره او دغلته حالات په خپله له نږدې وګوري.

د قزاقستان سفیر خیرات عمروف-چې د ملګرو ملتونو د امنیت شورا پړاویز مشر دی- ویلي د امنیت له شورا نه په تېرو اوو کلونو کې څوک افغانستان ته نه دی تللي

:

"له دې سفر سره به د امنیت شورا غړي پوه شي چې افغانستان څه شي ته اړتیا لري او څه هیله لري"؟

نوموړي له رسنیو سره خبرو کې هیله وښوده چې د دې سفر مشري وکړي خو دا چې دا سفر به کله ترسره شي په دې هکله یې څه نه دي ویلي.

د چارو شنونکی فیض محمد ځلاند وايي د امنیت شورا د افغانستان په تړاو خپلې اندېنښې لري، ځکه دا سفر پلانوي:

"که حکومت د نړیوالې مرستې د دوام، له اوسنۍ کشالې د وتلو لپاره د سولې فشار او د افغانستان په هکله د سیمه ییزې همغږۍ رامنځ ته کولو برخه کې د امنیت شورا ملاتړ خپل کړي، دا به لوی پرمختګ کوي".

د سولې خبرو ملاتړ

عمروف دا هم وویل، چې افغانستان ته پکار دي له ترهګرۍ، د نشه يي توکو د قاچاق او پلاني جرمونو سره مبارزه وکړي.

په ورته مهال یې له سیمې سره د افغانستان د سوداګریزو اړیکو پر زیاتېدلو هم ټینګار وکړ.

هغه دا هم وویل چې د ملګرو ملتونو امنیت شورا د افغانانو په مشرۍ د سولې خبرو ملاتړ کوي:

"افغان حکومت د سولې خبرو ته د طالبانو د کېنولو هڅه کوي، دا بهیر باید د افغانانو په مشرۍ وي او نړیواله ټولنه دې موخې ته د رسېدو لپاره له دوی سره مرسته کولی شي".

فیض محمد ځلاند دا سفر د سولې په برخه کې مهم بولي او وايي د امنیت شورا غړي به په دې سفر کې د افغانانو د بنسټیزو ستونزو په هکله ارزونه ولري:

"د دې ارزونې له مخې به د جګړې، د نشه يي توکو، فساد او د هغو د مخې د ډب کولو لپاره پر لارو چارو غور وکړي".

تر دې وړاندې د امریکا د ملي امنیت سلا کار امنیت شورا ته د افغانستان د حالاتو په هکله جزییات ورکړي وو.

د امنیت شورا مشر عمروف دا معلومات په وخت او ډېر ښه بولي.

د روسیې او امریکا همکاري

په ملګرو ملتونو کې د روسیې استازي د مک ماسټر له څرګندونو وروسته رسنیو ته وویل، چې دی د نوموړي له ډېرو خبرو سره جوړ دی.

واسیلي نبنزیا زیاته کړه، چې په دې یو مخ هوکړه لري چې افغانستان کې د روسیې او امریکا همکارۍ ضروري ده.

نوموړي تېر ډیسمبر کې د ولسمشر د پوتین خبرې هم یادې کړې چې په افغان کشاله کې یې د روسیې او امریکا د همکارۍ پر اړتیا ټینګار کړی و.

 

لوستل شوی 481 ځله

خپل نظر وليکئ

ټولې کړکۍ چې د ستوري (*)نښه لري ډکول يې ضروري دي