کابل پولیس: له خلکو مو د وسلو ټولول پیل کړي

کابل پولیس: له خلکو مو د وسلو ټولول پیل کړي


 له نامسوولو کسانو سره د وسلې درلودل لږ تر لږه په څو پېښو کې لیدل شوي
د کابل پولیس وایي، دغه ښار کې له خلکو سره له اتیا زره میله ډېرې سپکې او نیمه درنې وسلې شته. د دوی په خبره، دې وسلو د پلازمېنې پر امنیت بد اغېز کړی او امنیتي ځواکونو یې ټولول پیل کړي دي.
د کابل امنیه قومندان وایي، په تېر کې مختلفو ادارو هم ځینې دا وسلې وېشلې او دوی یې مالومات لري. کابل کې تر ډېره هره ورځ جرمونه او پېښې ان کله کله د خلکو سر او مال له خطر سره مخ کوي.

د کابل سړکونو کې له سهار تر ماښام له وسلوالو ډک موټر تګ راتګ کوي چې ځینې دا وسلوال ان پوځي یونیفورم هم لري. اوس پولیس وایي دا بې قانونه وسلې ټولوي چې په مختلفو پلمو یې خلک ګرځوي.
اشرف غني د کابل نامسؤوله وسله والو بې وسلې کولو امر کړی
د کابل ښار په زړه کې وسله واله نښته
د شمال وسله والو ډلو کابل اندېښمن کړی
د کابل امنیه قومندان سید محمد روشندل د قومندانۍ مرکز کې د جرایمو شنلو ناسته کې وویل، د وسلوالو یو شمېر هغه سرګروپونه یې نیولي چې ناامنۍ او شوکو کې یې لاس درلود.
''د بې شمېره وسلې ټولول مو پیل کړي، خو ښايي کابل کې له اتیا زره میله ډېره وسله وي، چې ډیټابېس لري، او وېشل شوې ده زموږ د راتګ شپږ- اوه میاشتې کېږي، تر اتیا زره میلو وسلې ټولول وخت غواړي موږ ته هم وخت را کړئ ، موږ وروستیو کې عبید ونیو، حسیب مو فراري کړ، ملا موسا تره خېل مو هم ونیو چې د ټرانسپورټ او هم ښاروالي پیسې یې اخیستې، څارنوالۍ ته مو وسپاره، اوس له کور را وتلی نه شي، هیله مې دا ده وخت را کړئ چې نور کارونه وکړو. ''
کابل کې داسې کسان کم نه دي چې وسله یا ساتونکي لري، دا ساتونکي له سوداګرو نیولې له پارلماني غړو او سیاسي ډلو سره بدرګه وي.
د ولسي جرګې یوه غړي له نوم پرته ومنله چې د پخوانۍ دورې له سلو ډېرو وکیلانو له حکومت ترلاسه کړې وسلې او مهمات بېرته نه دي سپارلي، خو دا ډول کسانو لا غبرګون نه دی ښودلی.
له نامسوولو کسانو سره د وسلې درلودل لږ تر لږه په څو پېښو کې لیدل شوي او هغه هم چې د کرېکټ یا فوټبال سیالیو کې افغانان بریالي شوي، په زرګونو خلکو وسلې ته لاس کړی او په یوه شېبه کې په زرګونو مرمۍ د ښار اسمان ته پورته شوې دي.
د کابل ښاریانو اصلي اندېښنه ناامني ده، هغه هم یواځې چاودنې نه بلکې جرمي ډلې او کوڅه ډب غله چې د ښار په ګوټ ګوټ کې د نورو جیبونو ته کمین نیولي ناست وي.
 
لوستل شوی 55 ځله Last modified on جمعه, 31 جوزا 1398 17:45

خپل نظر وليکئ

ټولې کړکۍ چې د ستوري (*)نښه لري ډکول يې ضروري دي