په سعودي عربستان کې پر سینما بندیز لېرې کېږي

په سعودي عربستان کې پر سینما بندیز لېرې کېږي

سعودي عربستان اعلان کړی چې تر نژدې دریو میاشتو پورې به په دغه هېواد کې د سوداګریزو سینماګانو پر فعالیت بندیز، لېرې کړای شي.

نن دوشنبه د سعودي عربستان د اطلاعاتو او فرهنګ وزارت د خبر پاڼې په خپرولو وویل:"وروسته له ۳۵ کلونو د لومړي ځل لپاره به تجارتي سینماګانې اجازه ولري چې د ۲۰۱۸ زېږدیز کال له لومړیو په فعالیت پیل وکړي."

د ۱۹۸۰ لسیزې په لومړیو کې محافظه کارانو اسلامي هویت او فرهنګ ته د ګواښ له وېرې سینماوې وتړلې

.

څو میاشتې وړاندې د سعودي عربستان لوی مفتي د سینماګانو د پرانستل کېدو په صورت کې د "فساد او انحطاط"خبرداری ورکړی و، خو داسې ښکاري چې د سعودي پاچاهۍ پر پرېکړې یې اغېز نه دی کړی.

سینماګانو ته د کار اجازه د هغو نویو ټولنیزو، فرهنګي او اقتصادي بدلونونو یوه برخه ده چې د سعودي ۳۲ کلن ولیعهد محمد بن سلمان تر نظر لاندې پلي کېږي.

دی په سعودي عربستان کې د اصلي "اصلاحاتو"په انځور بدل شوی دی. په تېرو څو میاشتو کې په دغه هېواد کې د یو لړ فرهنګي او ټولنیزو بدلونونو خبرونه خپرېږي چې ښځو ته د موټر چلولو د اجازې ورکړه یې تر ټولو ډېر پام ځان ته ور واړاوه.

د اطلاعاتو او فرهنګ وزارت په خبرپاڼه کې ویل شوي چې له دغه اقدام سره به ډېرو خلکو ته د کار موقع هم برابره شي چې د هېواد له اقتصاد سره به مرسته وکړي.

د سعودي عربستان دولت وړاندوینه کړې چې تر ۲۰۳۰ کاله به تر ۳۰۰ ډېرې سینماګانې چې د پردو ټولیز شمېر به یې ۲۰۰۰ ته رسېږي په دغه هېواد کې فعالې شي.

دا وړاندوینه هم شوې چې تر هغه مهاله به په دغه صنعت کې ۳۰ زره دندې وي او د سعودي عربستان په اقتصاد کې به د سینما ونډه ۹۰ میلیارد سعودي ریال (۲۴ میلیارد ډالر) ته ورسېږي.

 

لوستل شوی 336 ځله Last modified on شنبه, 25 قوس 1396 19:33

خپل نظر وليکئ

ټولې کړکۍ چې د ستوري (*)نښه لري ډکول يې ضروري دي