پوځي يونيفورم کې د تېلو غله

پوځي يونيفورم کې د تېلو غله

د افغانستان د بیارغونې لپاره د امریکا د مرستو د سرمفتش اداره یا سیگار په خپل تازه راپور کې ويلي چې د افغان ځواکونو تیل 'غلا' کیږي. د سیگار په رپوټ کې ويل شوي چې لږ تر لږه د ١٥۴،۴ میلیون ډالرو په ارزښت تیل د امریکا د متحده ایالاتو او افغان امنیتي ځواکونو نه غلا شوي دي. په داسې حال کې چې د پنټاګون د اټکل له مخې افغان امنیتي ځواکونه په کال کې شاوخوا ۴،۹ میلیون لیتر تیلو ته اړتیا لري؛ د سیگار موندنې ښیي چې د

امریکا د دفاع وزارت د ۲۰۰۸ میلادي نه تر ۲۰۱۶ پورې شاوخوا ۱۰،۶ میلیون لیتره تیل د افغانستان د پوځي عملیاتو لپاره برابر کړي دي چې مجموعي ارزښت یې څه دپاسه ۱۳ میلیارد ډالر کیږي.

دا په داسې حال کې ده چې تېر کال هم  سیګار راپور ورکړی و چې د افغانستان د پوځي څانګې د وژل شویو منسوبینو له کونډو نه د هغوی د مېړونو د تقاعدي تادیو د ورکولو په بدل کې جنسي غوښتنې شوي دي. مخکې سيگار ويلي و چې  د ملي اردو اړوندو ادارو کې د شهیدانو له ښځو غوښتنې شوي چې تر هغه یي د خاوند د شهادت امتیازات نه ورکول کیږي تر څو د دوي جنسي خواهشات پوره نه کړي. بل لور ته څه موده وړاندې د افغانستان لپاره د روسیې د ولسمشر ځانګړي استازي ضمیر کابلوف هم ويلي و چې طالبانو له روسيې پيسې غوښتي او په دې پیسو له افغان امنیتي ځواکونو نه وسلې پېري. حکومت پر طالبانو د وسلو د پلورلو خبر رد کړی و.

که څه هم د امنيتي ځواکونو له کونډو څخه د جنسي غوښتنو اړوند د سیگار راپور افغان حکومت په کله رد کړی و او ممکن د افغان امنيتي ځواکونو له موټرو څخه د تېلو د غلا خبر هم رد کړي؛ خو په ټوله کې دا ډیر د افسوس او شرم ځای دی چې د امنیتي ځواکونو په لیکو کې داسې وجدان پلورونکي او د ناموس قاتالان شتون ولري چې د خپل د سنګر ملګري ناموس او عزت ته یې سترګې پټې کړي وي او يا هغه تېل چې د خلکو د ساتنې په موخه د دوی امنيتي موټرونو ته ورکول کيږي؛ دوی غلا او په بازار کې وپلوري. د مسلمان او افغان ملت لپاره دا ډیر د افسوس خبره ده چې له یوې خوا د مسلمانۍ دعوه کوو، د جهاد نارې وهو او ځانونه د جنت ټیکه داران بولو، خو له بلې خوا بیا د امنیتي ځواکونو په مقدسو لیکو او سپیڅلي یونیفورم اغوستلو سره سره بيا هم خپل وجدان او ضمير پلورو او د خپل موټر تېل په دښمن خرڅوو.

که څه هم امکان لري چې د افغان ځواکونو د مورال ښکته کولو او يا په ټولنه کې د افغان امنيتي ځواکونو د نوم د بدولو لپاره ځينې بنسټونه او هېوادونه ورته څرګندونې وکړي چې ګويا دوی خپلې وسلې پر دښمن پلوري يا د امنيتي ځواکونو له کونډو جنسي غوښتنې کيږي او يا دوی له دښمن سره لاس لري، خو په ټوله کې دا د ټول ملت او د ټول افغان حکومت لپاره د شرم وړ خبره ده چې د امنيتي ځواکونو په اړوند داسې خبرونه خپريږي چې هم دين او هم يې فرهنګ مخالفت کوي. حکومت يې بايد جدي پلټنه وکړي او د امنيتي ځواکونو په سپيڅلو لمنو دې د ننګ دغه داغ پيدا  کوونکي خدای شرمولي خلک د عدالت ميدان ته راکش کړي.

که څه هم سیگار اوس په تازه کې د افغان امنيتي ځواکونو د تېلو د غلا په اړوند راپور خپور کړ خو له وړاندې داسې اوازې موجودې وي چې د امنيتي ځواکونو په لیکو کې ځينې پلورل شوي او دښمن ته وفادار خلک شته چې د امنيتي ځواکونو له موټرو تېل راوباسي او بيا يې په دښمن او يا په بازارا کې پلوري. هغه څه چې په دې مورد مونږ د خلکو له خولو اورديدلي وايې چې ځیني افسران او منصبدران د شپې لخوا د موټرو ټانکيو ته پيپونه ښکته کوي، تېل يې راباسي او بيا يې په کوچنيو بوتلونو کې له پوځي مرکزه راوباسي. دوی د تېلو د غلا لپاره آن د پيپسي کوچني بوتلونه په بډو وهي، د خپلو شخصي موټرو په سويچ بورډونو او آن د شخصي موټرو په هغه ځای کې چې بريک او ایکسليټر شتون لري؛ له شترينګ لاندې بوتلونه ږدي او بيا يې په دې طريقه له پوځي مرکزه راوباسي او د باندې يې په خلکو پلوري.

حکومت بايد ياده قضيه جدي ونيسي، د امنيتي ځواکونو ليک چاڼ کړي، هغوی چې شخصي موټرې لري بايد په دقيق ډول تلاشي شي او بيا هغوی چې د تيلو او د امنيتي ځواکونو په نورو اړتيا وړ موادو لکه شيدو، ملايې، غوښې او نورو غلاوو کې لاس لري، اشد مجازات کړي څو نورو لپاره د عبرت درس وګرځي.

لیکه : خوشحال آصفي

 

 

 

 

لوستل شوی 57 ځله

خپل نظر وليکئ

ټولې کړکۍ چې د ستوري (*)نښه لري ډکول يې ضروري دي