سوله او ټاکنې دواړه مهمې دي

سوله او ټاکنې دواړه مهمې دي

محمدروښان ښاد

په دې وروستیو کې ځینې افراد او اشخاص کوښښ کوي چې په لوی لاس سوله او ټاکنې یو د بل په تقابل کې وښیي. دوی داسې اوازې او پروپاګند کوي چې ګواکې حکومت او ولسمشر غني د ټاکنو او بیاځل ولسمشر کېدو لپاره سولې ته چندان پام نه کوي او یا ارزښت نه ورکوي او یا بېخي د سولې مخالفت کوي.

د دوی دا ډول بې اساسه تبلیغات نه یوازې له حقیقته لیرې دي، بلکې دا د ولسمشر غني په حق کې لوی ظلم ځکه دی چې د سولې په برخه کې چې څومره بریاوې ، پرمختګونه او هیلې موجودې دي دا ټولې د ولسمشر غني د بې درېغه هڅو او کوښښونو برکت دی، ځکه په تېرو څلور نیمو کالو کې موږ ولیدل چې نوموړي په هره لویه او وړه رسمي او نارسمي غونډه او وینا کې د سولې نه یوازې یادونه کړې، بلکې په سوله یې ټینګار کړی دی.

ولسمشر غني لومړنی کس و چې طالبانو ته یې په واضح ډول د سولې بلنه ورکړه او ورته وې ویل چې موږ حاضر یوو تاسو د سیاسي ګوند په توګه وپېژنو او بې قید او شرطه درسره د سولې مذاکرات وکړو. بیا یې اوربند اعلان کړ. ورپسې یې د سولې په اړه له بېلابېلو اقشارو سره مشورتي ناستې وکړې، د روژې په اوه ویشتم کندهار خرقې شریفې ته ولاړ او هلته یې د سولې لپاره دعاګانې وکړې.

پر دې سربېره په نړیواله کچه ولسمشر غني چې د سولې لپاره څومره لابي وکړه نو ټولو ته معلومه ده. امریکا یې دېته قانع کړه چې په خپله ستراتیژي کې د جنګ تر څنګ سولې ته ځای ورکړي او هغوی د جنوبي اسیا او افغانستان لپاره په خپله ستراتیژي کې په واضح ډول د سولې یادونه وکړه. د جنیوا کنفرانس کې یې نه یوازې د سولې لارنقشه وړاندې کړه، بلکې د حکومت د سولې مذاکره کوونکی پلاوی یې هم اعلان کړ.

ولسمشر نه یوازې تر نورو زیات سولې ته ژمن دی، بلکې د سولې لپاره پیاوړې اراده او برنامه لري. مګر ولسمشر غني د نورو غوندې له سولې سره احساساتي او شعاري چلند نه کوي، هغه وایي موږ سوله په بیړه نه، بلکې په تدبیر غواړو. پر سوله معامله نه راته د منلو وړ ده او نه هم چاته اجازه ورکوو چې پر سوله معامله وکړي.

ولسمشر غني هم سولې ته ژمن دی او عملاً ورته کار کوي او هم د ټاکنو د ترسره کېدو غوښتونکی دی ځکه هغه وایي چې سوله او ټاکنې یوه د بلې بشپړونکې دي. موږ د سولې پروسې د تطبیق او بشپړولو لپاره منتخب حکومت او ولسمشر ته اړتیا لرو او همدارنګه د شفافو او سراسري ټاکنو د ترسره کېدو لپاره سولې ته اړتیا لرو، سوله او ټاکنې یو د بل په تقابل کې نه دي، بلکې یو د بل بشپړونکې دي او دواړو ته باید له زړه نه کار وشي. سوله د ژوند او ټاکنې د واک د سوله ییز لېږد دویم نوم دی. په افغانستان کې تر دې دمخه د واک د لېږد لپاره بشري ناورینونه رامنځته شوي، نور باید دا دود ختم وګڼل شي او د ولس په خوښه او اراده هغوی ته د واک چارې وسپارل شي چې د ولس په خوښه او رایه انتخابېږي او تر دې مهاله ولس تر بل هر چا په ولسمشر غني زیات باور لري، ځکه نور نور د ټاکنو پرځای د موقت حکومت نارې وهي.

 

لوستل شوی 30 ځله

خپل نظر وليکئ

ټولې کړکۍ چې د ستوري (*)نښه لري ډکول يې ضروري دي