غني او اتمر د قانوني له قوله وپېژنئ

غني او اتمر د قانوني له قوله وپېژنئ

محمدبشیر یوسفزوی

د محمدیونس قانوني یوه نوې غږیزه ویډیو تازه د رسنیو لاسته ورغلې ده. ښاغلی قانوني د راتلونکو ولسمشریزو ټاکنو په اړه خپلو ټلوال خېلو ته سلا مشورې ورکوي. د دوی هدف دادی چې څنګه په افغانستان کې نظام په داسې توګه بدل کړي چې دوی او د دوی راتلونکو نسلونو ته په کې زیات واک ورکړل شي

.

په همدې ارتباط چې غږیږي نو د دوه نوماندانو اوسني ولسمشر ډاکټر محمداشرف غني او د محمدحنیف اتمر نومونه یادوي. ښاغلی قانوني په ډاګه وایي چې د ساختار تغیر د ولسمشر غني لپاره سره کرښه ده، په هیڅ شرط یې هم نه مني، نو له ده سره جوړجاړی نشي کېدلی، مګر محمدحنیف اتمر ورسره د ساختار د بدلون په ګډون هر څه په اسانه منلي دي.

هغه وایي د اتمر ملاتړ باید د دې لپاره هم وشي چې یوازینی کس چې ډاکټر غني له ارګه اېستلی شي هغه محمدحنیف اتمر دی. ښاغلی قانوني په دغه ټوله وینا کې یو ځای هم د افغان او افغانستان د راتلونکي خبره نه کوي هغه یوازې د خپلې ډلې، ټپلې او تاجکانو غم اخیستی دی.

په تېرو څلورو کالو کې ولسمشر غني او ښاغلی اتمر خلکو ډېر ښه وپېژندل، ځکه ټولو لیدل چې ښاغلی غني د افغانستان غم اخیستی و، شپه او ورځ یې پر ځان یوه کړې. کار، کار ، کار او بیا هم کار. مګر ښاغلی اتمر بیا برعکس په خپل ځان کې ورک و، ټول وخت یې خپل ځانته په کار او کمپاین تېرېده. د همدې لپاره یې د ملي امنیت شورا دفتر تشکیل دومره وپړساوه چې نږدې و انفجار وکړ. د هر ګوند او سیمې غیر مطلوب کسان یې د معاون، سلاکار او کارشناس په توګه په لوړو معاشونو له ځان سره وټاکل.

د ښاغلي اتمر د مشاوریت پرمهال ورځ تر بلې امنیت مخ په خرابېدو و، طالبان د ښارونو او مرکزونو تر دروازو ورسېدل. د ولایتونو د سقوط هڅې وشوې. وېره او ناامني زیاته شوه، ځکه چې له یوې خوا ښاغلی اتمر په خپل ځان اخته و او له بل لوري یې خلکو ته عملاً ښودل چې ښاغلی غني امنیت نشي راوستلی او په دې ډول به په ټاکنو کې خلک په اسانه قانع کړي چې ده ته رایه ورکړي.

د ډیورنډ پر سر د معاملې تور هم پر اتمر پورې و او داسې ویل کېدل چې ښایي اتمر له پاکستان سره د خپل راتلونکي لپاره معامله کړې وي. ولسمشر غني چې د اتمرپه نیت او اراده پوه شو، نو سملاسي یې له دندې وشاړه.

مګر ښاغلي اتمر له دندې له شړل کېدو وروسته په پخوانیو جنګسالارانو را وګرځېده او د هغوی کورونو ته په ننواتې ورغی. له دوی سره یې د معاملو موضوع ګرمه کړه ان تر دې چې د افغانستان په ملي ګټو، ملي مسایلو او د نظام په جوړښت او اساسي قانون یې هم معامله وکړه، د ښاغلي قانوني څرګندونې یې ښکاره ثبوت دی.

مګر ولسمشر غني د ټولو فشارونو باوجود نه یوازې په ملي مسایلو او اساسي قانون کومه معامله ونه کړه، بلکې د دفاع لپاره یې لکه سپر ولاړ دی او مقاومت کوي. ولسمشر غني د واک د غځولو لپاره د هر ډول بدرنګه معاملې مخالف دی. هیله ده چې ولس ښاغلی غني او اتمر پېژندلي وي او په راتلونکو ټاکنو کې ورته تصمیم اسانه شوی وي.

 

لوستل شوی 158 ځله

خپل نظر وليکئ

ټولې کړکۍ چې د ستوري (*)نښه لري ډکول يې ضروري دي